Minggu, 19 Desember 2010

HIRING-HIRING PANTUN KOMRING



Hiring-hiring sija uwat di grup Facebook OKU KOMRINK PALEMBANG, jadi tipilih-pilih komenan sai kimbang holau. Terimakasih partisipasi kolpah piwari sai kok ngonjuk komen di status fb makai cara hiring-hiring. Mudah-mudah buguna untuk kita kaunyin wabil khusus generasi muda kumoring.

Podang candung kabawok
Tajom saranta bisa
Batang nyiwi nom toktok
Haram mak nganik rasa

Iwak mati di lawok
Layon mati lah tuba
Bak tungtungna tijokjok
Ana kapori bisa

Kadongian hiring-hiring
Rami di malam minggu
Nyak ngiram di Kumoring
Curitana holau radu

Bubiduk diwai doros
Timbana bawak joring
Saro-saro ku todos
Asak lapah paginding

Kumangi di lom liyoh
Wat umbau mak kanahan
Mak bangik kolpah jawoh
Jarang sipaliakan

Bintang satu diawan
Jak jawoh nyilok-cilok
Ronik hati dibadan
Suya dihulun mak dapok

Alang holau du balai
Isina pari ronik
Alang holau morli maranai
Cindona laju botik

Kuruk pulan pahalu tapah
Sumolom kukoring pahalu itik
Sikam himpun porda kolpah
Haga burunding idan ga botik

Bingi manom tungguk dalu
Minjakna kamawasan
Amon dapok bukilu
Pacak mak nyak burasan

Nyak mirak buah raman
Mon masak rasana mamis
Nyak mirak buanggoman
Tapi mak mangsa sai damis

Walau poros masakna mamis
Buah ngura guwai manisan
Payu tihalu kok kari nambis
Bakahna mih bola dirasan

Alang bangik nginum kopi
Salamna punti taboh
Kyai mak ngapi ngapi
Mih ga nyolik bugawoh

Punti taboh jak kumoring
Rondomko pai dilom uwai
Mae tian bola goring
Mon pandai mingida pai

Aluk-aluk bu jangguk
Kacici pandai nyanyi
Alang balagna hotuk
Kadongian jak jambi

Anadya konui siyok
Hanggop dibulung punti
Tahan ambolah buok
Amon ya sonang hati

Hatiku andiwak-diwak
Ngaliak baibai bulajar nasak
Isi pawon jadi tigayak
Sangkolakna tijurangkak

Ìjan sa ijan batu
Tingguai jaman bahari
Wat maranai kacah buntu
Katakat mak ulah nuli

Kanahmu na kolfah
Bugawi tingkat tinggi
Kuponah susah payah
Marik rasan ga mak jadi

Mon bugawi tingkat tinggi
Dang minjak magi-pagi
Mon burasan dimouli
Dang lupa bias pari

Mouli-na pedom jak ibi
Basa tigurahko ya marah
Minjak-na nganik kan ngingi
Bugulai tampuyak matah

Incang-incang kuriding
Kuriding bubu buntak
Mula pagun kusiding
Ya handak buntor pudak

Tipodogi kanahan buntak
Jak jawoh juk bidadari
Nanjin lapahna ngikak
Ya kimbang cuwik buri

Api cawa du ombai
Dang turui magi-pagi
Dang niku bingung posai
Lajuda nyopok mouli

Di bah wai... dunggak hujan
Dikiri-kanan uwat lawok
Mak bangik paraduan
Hun lupa badan ingok

Tiliba guk pulimbang
Pangayuh bawak joring
Sija angguwai ku miwang
Ninggalko tiuh kumoring

Lamon wat rama rama
Midang dipokmu mandi
Malaikatku yona
Ngantakko iram du hati

Amon wat rama-rama
Midang dipok ram mandi
Alang sonang na maha
Wat kanca lokok mouli

Ting... ting nyak
Kariting kurang minyak
Ya lapah nganyak-anyak
Pasipak kaling minyak

Buah manggo buah lamasa
Usung jak tongah baka-i kiding
Api kolpah curitaan sa
Sikam ja ga turuk ngahaning

Hiwang mu mak kukapandai
Hiwangku dilomhati
Amon niku butinadai
Sopokda sai holau hati

Alang nyak kapanuju
Bulalap bulung kucai
Walau zaman kok maju
Adat kita dang kacai

Sa tuha-tuha punai
Lokok pandaina nohlui
Amon tuha ngamaranai
Matida andogot iluy

Dang liak ko sai radu
Mari mak sakik hulu
Dimukak koq ga laju
Dang kita ragu-ragu

Mae mak sakik hulu
Pakaida tudung sija
Mae tian pahalu judu
Pangatu singgahda dija

Kartutu handah hulu
Pakanna ho halipu
Kuliakko sai kok radu
Mikir judu ya sakik hulu

Kartutu handak hulu
Torbang rik sisu baruga
Dang nomon mikir judu
Laju bang-bang ko juga

Kartutu handak hulu.
Baruga dilom rimba.
Mon haga mangsa judu.
Sopokda rasan tuha.

Guk huma ngusung bubu
Ti talang masang pinja
Amon kok mangsa judu
Laju gindingda gukja

Ti pasar amboli sembako
Mak tinggal buah jengkol
Mimang mirak tibambangko
Mih nyak rabai kona golgol

Ngaliak pari hati loga
Kobun langsak munih robu
Mon mouli ho kok haga
Buronggutda guk panghulu

Irfan Bahdim indo Belando
Makkung nganik iwak lampam
Amon anggaduh mouli cindo
Dang lupa ngabari sikam

Balando main bola sodok
Mulangna laju mahandok
Mouli cindo porlu tisopok
Sai hatina botik di-indok

Kartutu pandu pandu
Bupawai di galigi
Adik mak haga radu
Jomoh nyak nyopok lagi

Ti kobun mutil lamasa
Gulai mongan jomoh pagi
Morli cindo kok mangsa
Kari ambang2ko na lagi

Kartutu bulu halom
Nohluy dipangpang durian
Sorop ibi kok ga manom
Lajuda mandi di pangkalan

Bubuka tisiapko bolu
Mak holau kue kumbu
Harani kok mulai dalu
Bangik turui sanga kalambu

Mon uwat waktu luang
Kita lapah cakak tongkang
Mingi juga disuborang...
Turui lom klambu muyang

Walau bingi kok dalu
Dipa harani hujan
Mak jadi halanganku
Nyak haga manjau nihan

Mon pas harani hujan
Holau ngobrol rik niku
Uwat kopi bangik nihan
Dalih ngudut carutu

Nyakna laju ti huwang
Ngaliak lambahan mu torang
Bokah niku tomu rasan
Nyak liyom amit mulang

Jak paija nyak kok rabai
Kintu bakal supoja
Bangik nyak hurik posai
Jadi hantu rangraya

Kok saka mak ngalanjuk
Layon sikam ja langguk
Paponah-ponah biduk
Bokahna bola tihanyuk

Wat kucing maha maha
Paliak tikus mati
Lamon niku mak haga
Makya niku ngalaki

Kita porlu busatu
Mae mak corai borai
Famili porda padu
Hurik sadurai-durai

Kaway handak kancing pak
Kaway halom kancing nom
Handak mu nyak mak mirak
Halom ku nyak mak liyom

Sorob ibi midor-midor
Dangda lupa ngusung bolor
Mon sakik hulu pudor-pudor
Cubako pai nganik mie celor

Bangikna lapah2 cakak motor
Kuliling binting buputor-putor
Mon akas turui mih bukolor
Ngahonculda sinapang 2 pelor

Alang rami di pasar Bogor
Suara tian mih gontor
Amon kolpah pandai akor
Congki cak hulun ey kutija pintor

Kona uwai kukutku ngorngor
Diayot adikmu tungguk bintor
Mon kolpah piwari goring humor
Mudah2an jomoh mak kona tumor

Liba hulu busidan timor
Mak kala setor cawana tekor
Alang tihuang hati wak kondor
Pangrasa bakmi sei dikanik hulor

Sija tangguh kucutik
Nyak ganta dirantauan
Kaunyin dang salah cantik
Totopko juga iman

Nyopok iwak dunggak lanting
Sei tihalu... mih kepiting
Mon sei tuha kok ambimbing
Se ngura dang mak bukating

Nyopok iwak mangsa kepiting
Paranti mongan manuk porling
Mon tuha-ngura kok saling kating
Pasti makmur jolma kumoring

Pahalu kotan sua karing-karing
Tikanik posai tolu nga piring
Mon tuha ngura kok siganding
Tamtu ombay akas jd goring

Cuwik2 palangkik
Dipa sitola jona
Ngalangai bubu alu
Api2 ngonana
Iwak sai balag hulu

Mojong cukcuk digarang
Dalih nonton piala dunia
Mon garuda se monang
Alang logaku maha

Jak Jakarta ti Pulimbang
Bangik cakak kapal torbang
Wat pramugari buwok tijang
Ya tisongil nyak tihabang

Alang bangik anjala
Dibingi wahwah bulan
Anggik-gik adikna maha
Kok mangsa karindangan

Ombai akas kok tuha
Ompuna akil balih
Adik ho bangik maha
Anying kiay na sodih

Kawai basoh dang lopih
Lailaiko juga dijandila
Dang munih kiyai sodih
Habangko sambil maha

Alang mak bangik hati
Mak ditori ko mouli
Badan kalah bujudi
Mak pacak muloh lagi

Kalah / monang bujudi
Hurik ma ongka horti
Kinda guk tiyuh lagi
Liyom di guru ngaji

Langgar gunung kudaki
Lawok ga kusuborangi
Tinadaimu kok ngalaki
Ganta ya ngajar ngaji

Amon ganta guru ngaji
Sangun paija na qori
Kontu jomoh pahalu lagi
Titip salam jak kak hadi

Midang midang bukarito
Singgah pai di kalangan
Mon mimang yona cindo
Laju antaki da baban

Alang bangik hati kai galih
Ompai mangsa karindangan
Pocak mak ulah sodih
Tinggal nunggu undangan

Undangan kung tiguai
Foto copy na cadang
Karindangan sa ompai
Pocak lokok puhiwang

Najin puhiwang ya udo cindo
Pandai angguwai gado-gado
Jomoh kukayon nunggu toko
Nyak ga midang2 bukarito..

Dang niku salah sangka
Mon karindangan puhiwang
Yona tamtu bumanja
Mari kiai tambah sayang

Tiliba yot gunung batu
Lapah ngantakko baban
Kontu niku panuju
Lajuda tomu rasan

Bukarito guk kalangan
Mboli balur iwak tauman
Joh pagi ga kujuki baban
Mulang jak bujual dugan

Jak cempaka guk mangulok
Ngopi dilambahan kawan sma
Tamtu alang ladasna ngudok
Nganik durian jama-jama

Mojong cukcuk digarang
Sambil ngaliak bintang
Idan haga butandang
Andarak kuruk talang

Mon lapah kuruk talang
Dang lupa ngusung bosi
Kontu wat halimawong
Sae ngahalau jak buri

Makinda makai topi
Kontu dikopung agas
Bangikna mon wat kopi
Tunggalko dikaling bias

Lapah diburi akas...
Guk talang haga nampas
Lapah kahongas-hongas
Anjuk halipu kona bitas

Midang-midang di talang
Pahalu ratu balang
Bubunyi kadang-kadang
Anjuk sanak cakak marindang

Tinjuk juga usung mulang
Simpokko lom sabidang
Juki humbu kuah pindang
Guwai lobas hati cadang

Ratu balang umpan tajur
Tajurko mangsa tauman
Tiladuk kok tihanjur
Ompai ganta kupariman

Iwak tauman bangik nihan
Tawokna panjokjokan
Amon kok dipariman
Laju nyopokda anggoman

Rampai jabung sia jokjok
Kan na jak bias tahun
Mak pacak ga ti tawok
Ganta kok duman hulun

Basa mingi dikobun
Risok ingok lambahan
Amon ya kok dihulun
Alang makbangik badan

Alang manom lombahan
Tidipa adik-miadik
Api kok radu mongan
Kontu kan kari cutik

Amon mak ongka gulai
Lapah juga ti huma
Ngakukda iwak salai
Tawok mongan jama-jama

Kotan wat sanga canting
Tasakqo jomoh pagi
Tawokna karing-karing
Dang niku ronik hati

Amon adikmu ratong
Guwaiko uwai limau
Kayon mongan sai botong
Mae gogah halau-halau

Bakaka ninggam lobak
Balibis dilom piyos
Nyak nutuk cawa ubak
Saro saro titodos

Kupiyah kapik-kapik
Tipakai nuju huma
Mae hurik mak sakik
Nutuk cawa piyama

Bubiduk mak si timba
Suharna buluh kaor
Kok uni jak tisaba
Bak badan kacah midor

Lapah tihuma ngusung bolor
Haga nindai mulan pari
Alang bangik mon kok midor
Pas munih poray tolu harani

Iwak saluang bangik tiguring
Angguwai kahlin iwak botuk
Holauda ganta mon lagi goring
Pahalu Piwari di grup Pesbuk

Alang bangik nganik baliwah
Sambil nginum way kabung
Balag hatiku alhamdulillah
Pahalu kolpah haga gabung

Aluk2 bujangguk
Kacici dunggak pari
Amon lokok uwat rukuk
Pae kita sambil ngopi

Buah rambutan masak ti ingi
Buah durian masak di batang
Mak bangik oiiii ninggalko istri
Ngaranopko foto laju tikahiwang

Manuk enggang torbang melayang
Tiliak jak bah, gundangna tojang
Tikahiwang, tandomu lokok sayang
Mon losai gawian bugancangda mulang

Alang lamon kaliluang
Bugantung dibatang nyiwi
Payu mojongda digarang
Bukumpul porda iwari

Alang holau kalimpuh
Kalimpuh man peragawati
Laju kuruk dang gupuh
Akuk sei holau dihati

Anadia kolpah kita
Tolahna Satu Jiwa
Ya pandai kata mutiara
Pengurus FB Cempaka

Uwat munih ibu Halimah
Kolpah kita di Palasari
Ya jolmana cukup ramah
Saling modok-ko iwari

Balak hatimu punai
Ningkik dibatang jambu
Sonang hati maranai
Pahalu malam minggu

Pari usang ti tapi
Pakan itik sarani
Ratongmu lom inipi
Ngiramku bingi harani

Pari usang ti pawai
Pawaiko harani jumahat
Dang ingok ko lagi mouli
Hadot ganta kok nakat

Kuponah mapah dagu
Ngaguk aguk di ijan
Payu onti kutunggu
Ratongna najin idan

Cadang hati mon kok nakat
Tapi mak bada bada
Hati sa mimang agat
Titunggu tungguk rangda

Sai pitu rik sai walu
Bilangan limam bolas
Jak paija niku ku tunggu
Bakna ganta ma ongka kas

Lima bolas luang pitu
Tinggal walu hitunganna
Nyak mak pandai sai katunggu
Ngapi ompai cawa ganta

Bakdu nyak cawa ganta
Sobab nyiwikok gayur
Najin kuhatokatko ganta
Makmyocok hoda di umur

Tinggal uti utian
Ganta jadi solsolan
Tapi amon bagian
Umur layon halangan

Sai ruarik sai tolu
Jadina tambah koda
Makmadai mak pahalu
Bangat nyojarko rangda

Napi pari lamon hama
Tibako lom raga
Wat rangda nganak lima
Maruli lokok haga

Alang saro ngali sumur
Kacah ngisi wai siau
Kai galih mak mikir umur
Kacah ngaliak birbir siau

Lapah-lapah tongah bingi
Tiliu di kuburan
Pocak kok ngangi angi
Sopokan si irawan

Tamtu sai bangik rik rangda
Api lagi anak lima
Sopokan jolma ganta
Mari bangik ngingun na

Sai pitu rik sai walu,
Jumlah na lima bolas
Amon niku juduku,
Kupakan ko di agas

Payuda nyopok balur
Lapah ti martapura
Layon mak mikir umur
Tapi nundako sanak ngura

Balur sopat ti guring
Rik kan panas-panas
Mih pocak hasan goring
Padahal dipakan kona diagas

Jak turui bukumur-kumur
Haga lapah mintar nampas
Najin kai galih kok umur
Ngaliak rangda hongas-hongas

Paida kita ngaliak pista
Pista na di campaka
Solik pai sanak ganta
Sai tuha ngaku ngura

Bangik nganik hubi lompur
Rik iwak sopat balur
Kai galih maju mundur
Paliak bai bai kok durdur

Tisilut kulok lungkok
Ruyuhda badan sija
Tilikut da sangrobok
Bakah kok tungguk dija

Amon haga ti huma
Nyak nompah buah kundur
Amon kok nutul lima
Tamtu kok sorba kondur

Kawawa mak bigara
Tando badan salamat
Di cawa nyak hampura
Di hati nyak buimat

Anadiya niyai kartina
Angguwai gado-gado
Rangda nyak katarima
Asak ya lokok cindo

Alang pandai niay kar
Angguwai wajok kotan
Untap nyak bola kalakar
Pangucak rangda sina

Mona kolpah monada
Nyak nutul diburi juga
Layon irak kok kondur
Sikandua onti mundur

Midang-midang mboli kundur
Bukarito juga haguk Belitang
Mak api2 najin kok kondur
Onti tikoncongko makai tang

Karito sai busotang
Paranti akas tongah
Najin kok koncong bak tang
Matuh hoda ngongah ongah

Nyak ga lapah ti huma
Laju ambotit punai
Kimpak kita ja kok tuha
Tapi laku juk maranai

Maranai mandi pagi
Pakai sabun camai
Mouli kok kacah nori
Kok mirotok ngalaki


Mojong di panca panca
Ngisi uwai lom ponai

Jak paija sampai ganta
Matuh lokok maranai

Pindang bu lalap joring
Joringna jak kalangan
Sapoja gawi marketing
Kacah dihalau penjualan

Cindo mouli kariting ...
Dalih tersenyum simpul
Bangikna di marketing
Barang laris duit kumpul

Tian nganggap mak penting
Sai tolah na gawi marketing
Saran ku dang di guai poning
Mon kita anggawiko na goring

Alang cindo mouli kumoring
Rogoh pangkalan ngusungi piring
Alang botik jolma marketing
Barang dijukna horga miring.

Ti kobun lapah andarak
Ti huma lapah bubiduk
Bu angin kita ti howak
Men mongan bu sia lalak

Hujan diluah lamon kilak
Sanak2 rabai nampok pudak
Mongan busia jokjok nyak mirak
Apilagi uwat tawokna ... iwak

Mongan bu jokjok tawokna iwak
Iwak timanggang botuk kabawok
Luah di garang hujan kok kodok
Kuruk dilom nyindotko horok

Pagi-pagi burakik
Tiliba ngusung punti
Honing hatimu adik
Ganta kok maha lagi

Bu baban punti tuha
Tawok na ri kanian
Bak api nyak kok maha
Bak ya kok gajian

Ompai jak ngaliak gotasan
Mulang ngusung haruan
Mon kok radu gajian
Payuda guk kalangan

Jak huma ngusung punti kayu
Di lambahan nganik paku tumis
Kabiansa mpai hari minggu
Kita kalangan hari hommis

Dipangkalan lamon honi
Uwai mih cutik bokahkona
Mon kalangan lokok uni
Jamotko da pai duitmuna

Ti pulimbang rang kertapati
Singgah di indralaya amboli roti
Tian ayuk kok maha lagi
Bak kumis kiay galih kok tumbuh lagi


Alang bangik nganik karipik hubi
Karipik hubi jak mouli botung
Ajada bangik men kok bu baibai
Bingi harani salalu tikasonong

Amon kuti ngingun kora
Dang lupa tijuki pamongan
Malam minggu tini uwat acara
Parawatin bugadang di taman

Mon parawatin mangsa undangan
Dang lupa rukuk rik kusitan
Malam minggu bugadang ditaman
Kontu waria ratong kilu bayaran

Sanak balita ngotok jari
Kok balak ngotok kutu
Amon waria ratong butari
Kujuki bunga tando kenangan

Sikor balita ngotok gudu puan
Basa kok balak dipinang tian
Waria se pandai nari tamtu biduan
Seholauna kenalko tan dilambahan

Nyambuk pasa kita ruahan
Buka pasa rik buah-buahan
Kenalan rik biduan di luahan
Makin tiusung guk lombahan

Radu mongan tanihi botong
Sai tikanik mih kanian lontong
Sikandua kenalan rik bencong
Milih sai cindo Galih ngoncong

Lontong tikanik sua rondang
Radu mongan mojong digarang
Mon ya cindo kenalkoda di Awang
Mae diajakna indehoy ditalang

Ngaliak pancaringan di pangkalan
Buha mati di tomtom nyiwi
Sei makkung konal kita konalan
Sei kok konal laju silaturahmi

Dibingisa wahwah bulan
Sikor bangik sirasanan
Mimang kita kok kenalan
Mih mak ulah sikomenan

Ngawil bawong mangsa haruan
Tikanik jama2 sua panjokjokan
Mon porda kolpah risok sikomenan
Alang holauna mon laju sianjauan

Jaman kok dijungkalak
Adat kok dikulibang
Mouli bu calana buntak
Maranai buwok tojang

Aja kiyai wat curita
Sei angguwai hati mak goring
Sodih ngaliyak sanak ganta
Liyom sbg jolma kumoring

Paija rik ganta maongka bida
Adat budaya lokok man kita
Mon sanak ganta liyom bucawa
Porlu titawaiko sapa akasna.

Tarima kasih nasihat na
Kok ambukak ko hati sikandua
Mungkin salah sikam sei tuha
Mak nawaiko sanak bucawa

Ulih-ulihda di tan mama
Ombay pandai nanom langsak
Akas ho munih ahli anjala
Ti-ingok torus tapak jak sanak

Nanom langsak tumbuhna joring
Joring sei tumbuh buahna bidara
Memang nyak asli jak kumoring
Tolah tiuhna tiuh Kotanegara

Nanom langsak tumbuhna joring
Joring tipawai dikanik bakaka
Sikandua munih asli jak kumoring
Tiuh sikam tolahna Campaka.

Alang bangik gulai balida
Bu jokjok lalap joring
Tiuh kita memang bu bida
Sei ponting jama2 kumoring

Siya jokjok tawokna balida
Bangik tikanik mon jama-jama
Sumang tiyuh mak bada-bada
Kaunyin piwari mojongda dija.

Cawadu tian ombai
Dang bubiduk dunggak tambak
Amon kok pagaduh baibai
Wat morli dang tikadongak

Bubiduk dunggak tambak
Alamat bola paku pitik
Ngaliyak mouli tikadongak
Api mak rabai di tian adik

Ambaca buku sakik mata
Kukut sakik dikancak paku
Galih nyak ompai mangsa curita
Mouli cindo nyopok niku

Lapah sorob ibi bu karito
Anjonguk Herman di pos jago
Kupasang pay kacomato
Haga pandai sapa mouli ho

Nonton artis jak jawoh mak kanahan
Nonton jak podok mak tahan kapanasan
Mouli cindo sai disopok uwat di lombahan
Bakahna ombai bungsu nyopok pangasan

Wai pasang ga bulangui
Ga bubasuh di pangkalan
Radu bubuka landok turui
Akibat hawak dipamongan

Amboli kaniyan di kalangan
Taka bingka ti usung mulang
Amon risok hawak mongan
Alamat badan jd balondang

Ga nginang mak bu cambai
Ga ngopi mak ongka gula
Ga tidipa kuti idhul fitri
Amon pacak barong juga

Tiliba ti hulu mih ga lapah-lapah
Way langok mak pacak burakit
Maksud hati ngabangikko kolpah
Mih sayangna yoja mak siduit

Liba hulu ambabai jala
Busolom diway mangsa kalopit
Alang bangik kumpul bubuka
Pahalu kolpah sai lamon duit

Galih nyolom mangsa kalopit
Bakahna kalopit akas Zainal
Amon kuti ga mangsa duit
Payu kita ngidarko kutak amal

Kalopit halom pocak kok kumal
Isina katipi rik surat jak mouli
Kiyai Herman dapok bu amal
Seponting niat ihlas di hati

Ga mojong di garang posaian
Mak ongka rik mih rukuk sang batang
Harani bubuka kita sianjauan
Ngusung kanian bakana rantang

Lajuda gulik rodik pangasan
Hurikko lampu dang kamawasan
Bubuka tini kita sianjauan
Katupat rik rondang jd lantaran

Maksud hati ga sholat subuh
Ngakuk binyulu mak ongka uwai
Nyak mirotok haga bubuka di tiuh
Mak bangik pahalu mantan tinadai

Biduk tiliba kinda bukayuh
Alang lamon iwak kamudik
Mon kyai ga bubuka di tiyuh
Salamku titip di tan adik

Kok jawoh lapah kukut
Buhindop dibah batang
Amon anggoman kok ambacucut
Akukda duit juk koda gancang

Mon kamudik ratong
Tangkul ponuh iwak cucut
Asak tanihina kok botong
Tamtu mak lagi ambacucut

Kuruk rua minggu kita pasa
Makda muni lagi ga bubuka
Kok lijung tidipa rumpoksa
Di masigit kusopok mak ongka

Bujual pari mae wat ongkos
Duit-na lamon kalopit ponuh
Kolpah piwari mula-i buringkos
Tian mirotok haga mulang tiyuh

Paija wai kumoring lokok doros
Ganta kok kasat bak honi
Dangkung pai kuti buringkos
Sebab bubuka lokok muni

Isi lamasa golarna kamurak
Tipulpul ngahalom anjuk korak
Sai tiringkos mih labtop burak
Kontu dihuma uwat sai mirak

Ngaman da kuti mantop-mantop
Dang ingokko curita bahari
Tian di huma mak porlu lap top
Sebab mak pacak nyuburko pari

Losai mongan ngahisok rukuk
Kopi sang golas jd pasangan
Hingan pari bak tijuki pupuk
Sonang hati uwat hiburan

Kucing handak uwat di bah
Kucing halom dunggak panaku
Alang sodih hatiku kolpah
Pira harani mak ngaliak niku

Kucing garong kuruk tong sampah
Tikus tihuang lijung cangkolang
Makinda sodih hatimu kolpah
Nyak kok mulang jak butandang

Jawoh-jawoh jak suborang
Mih mirak nganik kampolang
Lajuda niku ga butandang
Asak ingok waktuna mulang

Lapah kok jawoh kuruk lom talang
Ngumpul ko suluh tiusung mulang
Nyak mak haga mulang butandang
Kecuali kok ngusung mouli jopang

Bandira kok tipasang
Jopang kok radu mulang
Dipayya pok butandang
Ga nganik impik2 panggang

Butandang tongah bingi
Kontu rawang kok tikunci
Mon haga jomoh pagi
Guk lombahan fatmawati

Ngusung duit lima ribu
Ti pasar yada amboli potai
Dibingisa malam minggu
Ga tarawih mak diparcaya baibai

Mon tarawih malam minggu
Makinda makai minyak horum
Mosti laju curiga baibaimu
Pangrasana ga nyopok inotum

Amboli bias lamon pari
Parina tijukko di sisu kalabai
Minyak horum mak pahalu lagi
Kok tijamot di galupah baibai

Mojong-mojong di rangraya
Haga ambotat kaliluang
Layon ya mak parcaya
Tapi diniku yana sayang

Mojong di garang bukalakar
Kopi nongah rukuk sang batang
Chiara saimona api kabar
Kita bupantun dalih budendang

Dik Ciara Saimona pandai munih
Nganjak2ko Herman Semendawai
Mon tan kiyaina kok ngulih-ulih
Dang mak angguaida kopi pai

Bubiduk-biduk rang cupang
Rongok haga guk talang
Tiladuk monah di garang
Bakah niku mak mulang

Mon lapah anjonguk kobun
Dang lupa ngusung bongkol
Nyak terimakasih dikutina pun
Kok singgah ngonjuk jempol

Mulang jak kobun ga bugancang
Ngusung punti rua nga tandan
Sai ditunggu layonda mak mulang
Kuruk rang buri mak katahuman

Kukut hurang marui
Tisopik dibah batu
Mon ya rang buri
Kontu wat sesuatu

Jak nganik sayur pari
Lokok bangik sayur kangkung
Bakna ya kuruk rang buri
Bakdu iya busabidang gantung

Si Galih robu kumis
Gawina gacah bukaca
Dihaturko niku nulis
Sikam mih numpang ambaca

Tikahaha iwak putak
Ngahaning kalakar labi-labi
Kumis nambija kok dawak
Ganta mak ongka lagi

Mon ga cakak motor pit
Dang lupa ngusung kalopit
Mon rajoki sikor sompit
Todos pai dang anjorit

Alang bangik nganik iwak tauman
Jokjokko disiya rik minyak koluran
Alang bangik uwat kamaman
Mak siduit dijukina injaman.

Buntak mih anggan ja da.
Kurang tojang ti sambung.
Sai jaoh ti dija da.
Payu miyot bugabung.

Lapah ti huma anjonguk pinja
Badan kamah ga buborsih
Kolpah sai kok bgabung dija
Diaturi ucapan tarimakasih.

Alang holau du balai
Isina parik ronik
Alang holau tinadai
Sayang na lokok ronik.

Pandaimu milih pinggan
Sai borak juk lapangan
Pandaimu nyopok anggoman
Tunggal sanga pangkalan

Alang holau mu puyuh
Sayang mak pacak torbang
Sikandua mulang tiyuh
Nyambuk mantu jak pulimbang

Kabayan tisungsung cakak karito
Pakaian-na songket ma bunga-bunga
Sikam jak jawoh mih nulung du'o
Semoga kuti kaunyin bahagia

Alang holau iwak sopat, warna ka hujau-hujau
Tipul-pul ngaluah minyak, rasana sodop nihan
Singgah dija mon sompat, idan lagi ga manjau
Ga mulang rasa biyak, botong ompai jak mongan.

Mongan kan mak sigulai
Untung uwat sambal jok2
Ngison2 bangik dibolai
Apilagi uwat sai andakok

Alang lamon jambu bangkok
Masak titiak laju ya porpor
Amon ngison ga budakok
Budakok juga dikompor

Api kabar du mokah
Cabi mak lalak lagi
Pira tahun ku ponah
Tapi niku ingkor janji

Lapah kuliah bakna mak singgah
Padahal kampusmu podok dikabolah
Mon tuon cakmu kok uni monah
Tamtu nyak bsyukur alhamdulillah

Tiliyu mouli asli jak minang
Mulang jak pasar amboli hurang
Dindamu sina dang lagi dikonang
Kok mangsa laki asal jak suborang

Nila Octa cindo hatina
Tiuhna podok di Matapura
Mon maranai wat sai haga
Hubungi nyak di FB Oku Cempaka.

Iwak kalang bangik tigulai
Tingusung tan kyai tolahna umar
Amon kok bukumpul moli maranai
Sai perawatin lijung guk kamar

Cakak biduk haga bulayar
Ngakuk sangu jak campang tiga
Parawatin lijung guk kamar
Bakna sirobut mouli rik randa

Pasadak-sadak dibuah langsak
Kakotong rua, ... tolu titiak
Mouli purokop, rangda-na puhojak
Perawatin lijung mak nuli cakak

Amon andokdok buah langsak
Mae mak titiak sadioko bakana
Mouli purokop rangda puhojak
Parawatin haga karua-ruana..

Mon haga ngawil iwak arowana
Umpan kucur tiakko diway
Mon haga mouli-rangda karua2na
Cak hulun bakas hawak dibay

Amon haga amboli kaway
Sopok di pasar atau di toko
Layonda baliau hawak dibay
Mihna mak haga diparobutko

Mon amboli kawai rik calana
Holauda sai bonangna kuat
Pocak beliauna lokok haga
Asak sesuai ongkos busunat

Rumayok di tiuh campang tiga
Numpang mandi di pangkalan
Baliau pocakna lokok haga
Marik gonok pak anggoman

Pangkalan pok bakas dikabolah liba
Sapa sai ga mandi makaida talosan
Kagaduh 2-4 anggoman holau hoda
Asak sei tuha lokok tijuki pamongan

Sorob ibi mulang jak kobun
Ngusung iwak disambuk baibai
Lajuda kuti saling bupantun
Badanku losu ga anggulik pai

Bakah kyai mak ngusung cambay
Mulang jak kobun ngusungko botuk
Mon kalosuan nihan gulikda pay
Ontini rawang kamarmu kutuk-tuk

Api cawa du ombai
Dang turui magi-pagi
Jak niku bingung posai
Holauda nyopok laki

Mari mak turui posai
Mak kangisonan lagi
Anjadiko pikiran losai
Nambah kolpah iwari

Ombai2 ninawai
Kamanakanna ropa
Ganta nyak buombaipai
Jomoh jadi mantuha

Sorop ibi nyolom di uwai
Bakahna mangsa kuwini
Ganta pa ombai ombai
Bulan mukak tikahwini

Gantung salai ninawai
Uwat sai tiluah cutik
Asak bumantuha diombai
Hortina anggunik dibicik

Alang lamon kuwini
Kukanik dibi pagi
Ombai-ombai pun jadi
Asak gohgoh rik yuni.

Bupantun nyotok kuwini
Gitohna gohgoh rik kayap
Man mangsa cindo juk yuni
Parodik turui mak tikanyap.

Kuruk kobun ndokdok nyiwi
Nyiwi paranti angulaiko daging
Man anggoman cindo 'juk Yuni
Hati loga juk ningkik dilanting

Mulang jak midor di kalangan
Ga mongan kan na kok basi
Ompai mojong rik karindangan
Anggoman ratong ngusung bosi

Lapah guk kobun anggali sumur
Tanihi botoh tikanikko bubur
Ponah juga kinda ngahambur
Kenalko kalau2 tan rua laju akur

Tanihi botoh mirotok ga mongan
Sia jokjok iwakna iwak tauman
Kurelako ninggalko karindangan
Asak lokok disayang anggoman

Nyopok tauman alang sokotna
Jak Matapura laju guk Blitang
Ninggalko karindangan posai2na
Alang kasian mouli sina miwang

Ia ga miwang kok kanahan
Tilajuko anak mak mongan
Amon niku mimang kasihan
Jadi koda ia karindangan

Akas mirotok pindang tauman
Cak ombay ngawil pai di pangkalan
Bakna mouli ho tibagiko dikawan..
Nyak nggok kontu ya kok katan

Mojong dirawang lunok
Nuntun bukit barisan
Walau nyumapu di pok
Juk mojong sibanjaran

Dibingi langik mondung
Pagi-pagi lamon ombun
Balak hati niku bugabung
Ngaramiko kita bupantun

Bubunyi riang-riang
Ningkik di batang nyiwi
Bupantun akas sonang
Panglobas galang hati

Aluk-aluk bujangguk
Karcici dunggak nyiwi
Amon risok tijonguk
Kontu ya ngajak mingi

Karcici dunggak nyiwi
Tanggalsa tanggung bulan
Man mouli mbato' mingi
Mih nunda cadang badan

Si Bulan ngakuk kumangi
Mindangko iwak tenggiri
Mon porda siajakan mingi
Hortina kok jadi "pasutri"

Karcici nganik nyiwi
Lamon tikus nganik pari
Mon mouli ngajak mingi
Dang kiai nulak rajoki

Nyak pandai rusio tupai.
Carana nobuk nyiwi
Man morli ngajak mingi
Tandona kok ga jadi

Mon tupai nganik nyiwi
Tamtu botong tanihi
Basa mouli-maranai ga jadi
Tian ngundang iwari

Nganik kan kambolonan
Nginum way mak tiliyu
Turui kacah nginongan
Risok ngiram diniku

Kan handak gotok gotok
Tikanik kambolonan
Kontu jomoh mirotok
Jak ganta jadikoda kawan

Amon sina cawamu
Onti ku tutugan ko
Jomoh mon tiliyu
Nyuriak dang busomu

Mon haga nogak sapu
Tuarko batang tambosu
Mon tan adikmu busomu
Tamtu yu do liyom diniku

Ngisi way di lom baskom
Nasak kan dilom panci
Sifat mouli liom-liom
Kok mangsa kilu lagi

Sodop pindang rik kumangi
Tanihi botong saro minjak
Mon wat mouli ngajak mingi
Dang lupa batok pai nyak

Kuruk pulan nunda basoka
Haga ninjuk manuk bakaka
Herman ka ajak bubuka
Tan akas maha .. wakakaka

Ga bulangui rabai wat buha
Mandi butimbuk makai calana
Tan akas ho mih pandai maha
Tijuk mouli langsung bukasona

Mouli puliom panongtong
Niwalai koding siku
Sanga pinasak sodong
Mak urung kacah kilu

Jak liba halau-halau
Ombay ga kaguai cuko
Mouli liyom yona holau
Asak ya mak ngaliyomko

Mirotok nganik bolu
Ti pasar da amboli
Harani kok ga dalu
Dang lagi curita mouli

Ngalih rasan da kolpah
Dbingi sa ko’ dalu
Nyak burasan bulung nipah
Ga ku guai sapu sapu.

Ngahuma mangsa bias
Wat gitoh mangsa nampas
Kok dalu lamon agas
Peh kita kuruk klambu akas

Ngakuk duit dilom brankas
Duit bukurang layon nambah
Dang kuruk kulambu akas
Marik ombai ga kilu jatah

Nanom lopang di talang
Mati dibolik bayot
Morli lamon sai miwang
Tinadai na bola katakat

Nganik bingka sua gula
Inuman na kopi torabika
Mon tinadai mu kok bola
Ngaman da juga dihuma

Bola kalakar mingi dihuma
Dalih nyiding manuk bakaka
Mon tando kita bukanca
Sopok kopai calon kuja

Alang ladas ngaman dihuma
Sambil ngawil nganik semangka
Uwat calon mih 1 hana hana
Ya rangda kok buanak lima

Guk huma nyangu bingka
Ngalobung ngusung baka
Api juga statusna nyak haga
Asak sikam jama-jama suka

Ambancah makai candung
Anggotas bubatokan
Idan ga diusung lijung
Ya monah dipangkalan

Biduk mak sipangayuh
Laju suhar tanggulang
Kita unyin jak tiyuh
Bubuka dang mak mulang.

Makinda butalosan
Mon mandina dibingi
Mak ombih ga solsolan
Sang nakbay sai mihani

Pangkalan lajuda mandi
Mandi mak butalosan
Dang cakmu basa basi
Kontu jadi solsolan.

Pahalu putori mandi
Tikanik togi harani
Walau mih basa basi
Dalih nyonangko hati.

Nganik punti tingguring
Pulikko rik mantiga
Tungguk ganta nyak goring
Ulah cawamu paija

Holau masigit ari rua
Hatokna onjak gonting
Walau niku pucola
Nanjin ya matuh goring.

Tojang buwok kariting
Kacah tipulos cina
Paija nikuna goring
Bakna ganta dicola.

Moulina tojang buwok
Dipa munih hubanan
Amon cak angok-angok
Mak ti giyah jak haban

Amon haga pangkalan
Lapah bu iring-iring
Walau mouli hubanan
Wat hoda sai goring.

Guai apimu lanak
Cambai nambun dipokon
Guai apimu di nyak
Karindanganmu kok lamon

Cambai lamon dipokon
Anying kok bola layu
Walau sai barih lamon
Mih niku sai kutuju

Api hagaku diniku ...
Tuhan hoda sai pandai
Nginum wai mak tiliyu
Ngating jumpuk tikacai

Kutotopko mak mantop
Juk mojong dunggak galang
Turui mih sanga silop
Miyah bupantos miwang

Honing hati kartutu
Bulan torang nganyawang
Alang bungah hatiku
Ngaliak tinadai miwang

Ibung asal jak buluh
Tawokna lalap potai
Miwang tungguk luah luh
Maha ti sahai-sahai

Mon mongan lalap potai
Jokjokna iwak botuk
Mon maha pasahai-sahai
Kontu marik tikahotuk

Bubiduk di way doros
Pangayuh bawak joring
Saro saro ku todos
Asak indokmu goring

Bubiduk diway bokbu
Timbana tapak pungu
Badan saro kok radu
Bakah indokna mak panuju

Nyak pandai dihumamu
Jukukna nyoput -soput
Nyak pandai diumakmu
Ngiram mantu sai gorut

Humaku rik humamu
Mih pisah sang pamolang
Umakmu rik umakku
Kok haga sisandingan

Andukku rik andukmu
Tipawai dilai-laian
Ubakku rik ubakmu
Mirotok sisabaian

Ngahulu ti tambangan
Kasad di burik honi
Payu kita sibambangan
Kuponah onti bingi

Alang lamon du hubi
Titunda di pangarayan
Sina sei nunda sakik hati
Tinadai kok sibambangan

Bunga cempaka handak
Ganta kok haga layu
Tinggalko juga nyak
Mak buguna diniku.

Dang galak nganik cuko
Cuko nyadangko ipon
Dang galak disai cindo
Sai cindo galak lobon

Cuko ti campur burgo
Rasana hasin lalak
Bangik nyopok sai cindo
Asak dompet dang bak-bak

Panas tongah harani
Rogoh diwai ga bubasuh
Alang sakik duhati
Ngaliak kalopit ho kok ngoluh

Tipulimbang nunda buluh
Dang lupa singgah di plaju
Amon kalopit kok ngoluh
Mahap mak katulung bakku

Alang bangik nganik sawo
Sambil ngalapahko karito
Payu kolpah tulung du'o
Tapi dang nyak dijorako

Alang galakmu di sawo
Lokok bangikda manggo
Mak ongka sai ga anjorako
Asak niku risok budu'o
 

Kuliahda sai botik
Dang risokga ambolos
Najin weselmu cutik
Kuat-kuatko butodos

Mongan cutik sanga bitah
Dang niku rabai botoh
Seponting pandai kuliah
Nuju bangikmu jomoh

Indok bapak rik tombaymu
Budu’o di sai kuaso …
Pangatu dang mak laju
Jomoh tini ompai kayo

Dang miwang niku anak
Ubakmu ompai butandang
Nyopok balanja cutik

Parantimu marindang

Ajaiya samalingkung
Kiriman jak indokmu
Sodop laju dilungkung
Tawok mongan saminggu

Duit  ruanga puluh ribu
Dang munih labah labah
Umak ngakuk upahan nutu
Ubak kuli ambancah.



Tidak ada komentar:

Poskan Komentar