PUTRI BALAMIKA

Harani sara manom. Si Mat monah bantuan jak tiyuh, anying kok uni ditungguna disapu sina ... bantuan makkung ratong. Ya laju tika turuy, ya ngarasa mak bangik badan... mahandok.
Badan-na panas-ngison, bakdu kok lamon ngumban rah. Halokna munih terinfeksi virus Rabies jak ipon atau kuku halimawong sina. Efek rabies pandai nimbulqo halusinasi.

Mak munih dirasai Si Mat, sikor tikaturuy... sorom ngarumun ponuh di badan-na.
Si Mat ompai nginongan waktu andongi suara halimawong andongus-dongus di bah sapu. Si Mat ngintik jak sai-sai lantai sapu-sapu. Mak salah lagi, ina pasangan halimawong sai dipatikona jona.

Si Mat ngamatiqo badan, ya ngarasa untung bakdu umbau badan kok disalok sorom jadi halimawong sina kelobonan jejak.... mak jadi cakak dunggak sapu.

Si Mat kari-kari ga tikayyoh, anying ditodosna judayya.
Mak uni jaksan halimawong sina anjawoh muloh, Si Mat kimbang loga.

Anying rasa mahandok sara biak. Si Mat kondisina antara pingsan rik makwat.
Halusinasi mula-i menyerang, pangliakan-na bukunang-kunang.
Pandongian macom-macom munih... anjuk suara jolma bukumpul dikalangan, anjuk lamon suara jolma ngumung, maha-maha.

Harani sara manom, angin ditalang sina andosuh pocak-pocak ga hujan.
Si Mat ngumbani sorom-sorom halom sai nandok di badan.

Sikorna ngopus-kopus sorom... didongina uwat jolma cakak ijan sapu-sapu sina. Jolma ho tumpak togak dihumara rawang.

Tan rua jama-jama pocak tihuang. Jolma ho noriko mona.
"Bakna pun ... nikuna uwat dija ?, poksa duman sikam... ija pos jaga sikam !"

"Kamahapan pun sikandua numpang buindom sangrobok, bakdu keadaansa darurat... ompai jak kona gangguan halimawong", cak Si Mat dalih ngawasi jolma sina.

"Mon supona miyot nyak juga... onti niku sikam lobasi", cak jolma sina ngajak Si Mat rogoh jak sapu-sapu.

Tan rua rogoh ninggalqo sapu-sapu burak sina. Si Mat antara sadar rik makwat miyot bakas sina lapah... diusungna antah haguk pa.
Cutik curita Halusinasi, ... lom ilmu psikologi yona persepsi panca indera sai terjadi tanpa rangsangan reseptor panca indera. Istilahna persepsi tanpa obyek. Pandai andongi suara atau ngaliak atau ngumbau sesuatu tanpa rangsangan visual maupun rangsangan jak indera penciuman.

Macom-macom jenis halusinasi, misalna :
Halusinasi Visual, ngaliak sesuatu sai sebonorna maongka. Atau ngaraso seolah-olah ngaliak sesuatu sai jolma barih mak ngaliakna.

Halusinasi Akustik, andongi suara-suara kacau balau. Wat munih halusinasi Phonema, andongi suara-suara sangat jelas.

Halusinasi Olafaktorik, misalna ngumbau tanpa wat sumber bau.
Halusinasi Haptik, gejala halusinasi sija seolah-olah ya pandai bersentuhan secara fisik rik manusia atau benda barih. Biasona halusinasi sija berhubungan rik masalah seksual.

Halusinasi Kinestik, mon ngeraso seolah-olah jiwa tilopas jak badan atau pandai-pandai badan burubah bentuk atawa bugorak diwik.
Halusinasi Autoskopi, seolah-olah ngaliak badan diwik togak sihadop-hadopan.

Isi halusinasi biasona kecemasan. Api sai dihalusinasiqo yona projeksi jak kebutuhan psikologi/ sensor/ perasaan bersalah/ keinginan utk mendapatkan kenyataan sai lobih memuaskan.

Halusinasi pandai timbul bakdu penyakit toksik/ organik. Halusinasi bukurang mon pasien wat kegiatan, sara nomon amon ya galak ngalamun.
Halusinasi dijolma normal, misalna halusinasi Hypnagogi sai timbul waktu ya antara turuy rik makwat.

Lanjut curita.... Si Mat lapah barong bakas tuha sai makkung ditinongna.
Talang pok tan rua lapah sara wah-wah. Suara tawak-tawak sara nyaring kadongian. Pocakna tan rua sina nuju patiuhan sai mirip padepokan.

Mak uni mula-i kanahan jolma bay-bakas alang lamon-na, anying jolma dewasa kaunyin mak ongka sanak ronik disan. Seolah jolma lamon sina sikor menyambut kedatangan Si Mat rik pengawal.

Si Mat disambuk tolu mouli cindo handak langsing, ... dikalungi tian bunga cempaka. Radu sina dirandan tian kuruk lombahan.

"Sijada pun mess pok niku mingi dija !. Mouli tolu sija tukang ngaladinimu!" cak pengawal sina di Si Mat dalih ya amit ninggalqo pok sina.

Tanpa nunggu parintah, tolu mouli sina ngalopasqo pakaian Si Mat. Jimat sai ngalokok digalah Si Mat dikacaiqo tian munih dalih mouli tolu sina maha-maha seolah kok sitinongan muni.

Kas katan-katan dibadan Si Mat dilap-lap tian rik madu sambil tian ngarok-rok, sambil pocak bumanja munih.
Losai bu-lobas rik bu-ayot... Si Mat ngaraso badan-na kok perkasa muloh.
Ya dipakaiqo mouli-mouli sina pakaian holau. Mak lagi makai kawai-calana paranti nampas.
Disalin tian rik calana beludru siau, sabidang songket siau-siau benang mas, kawai-na teluk belanga jingga, bobot tukang kusir warna hujau, tudung songket mahulu korbau. Sapatu bud halom sapatu aksi.

Disamporut tian munih rik minyak nyong-nyong... inggona horum nihan, nyotil abis.

"Alang holau-holau pakaiansa, haga diapiko kuti nyakja ?!" butanya Si Mat di mouli sai sikor noktoki janggukna.

"Niku sangrobok lagi haga sikam antak ngahadop paduka Putri Balamika !"

"Putri Balamika ... sapa yona gila ?, ompay kupadongi tolah sina ?! cak Si Mat dalih ngalah-kalahqo jimat-na muloh.

"Ya udo Ratu sikam dija !.... cak mouli sina dalih ngijok-kijokqo mata.

Mak uni jaksan... bakas tuha pangawal ho jona ratong luot ngonjuk parintah, ... cakna :
"Mon kok siap... usung-da calon mempelai bakas ho luah !"

Si Mat tumpak nyimbat : "Oyy pun... sikandua ja kok uwat anggoman ditiyuh, ... ompai saminggu jadi kabayan !" cak Si Mat jujur.

"Ina khan ditiyuhmu ... mon di-istana sikamja sapa juga bakas pacak kuruk dija sikam anggap lokok maranai !. Halu-i da pay lahmu ratu sikam Putri Balamika, ya udo mouli sacindo-cindona dija... mon nulak kontu niku laju nyolsol ! "

"na payu mon supona ga ku halu-i pay !" cak Si Mat mula-i tepengaruh.

Si Mat laju dirandan tian luah jak mess pokna busalin kawai.
Tawak-tawak rik torbangongan dibunyiqo tian muloh.... "tak tak dung... tak tak dung !".

Jolma bay-bakas lamon sai miyot diburi Si Mat.... "tak tak dung... tak tak dung !" tawak-tawak torus bubunyi ngiringko mempelay bakas.

Mak uni jaksan rombongan kok tungguk di humara rawang pok singgasana Putri Balamika.
Ratu sina tumpak togak nyambuk Si Mat sai di haga kona jadi laki. Tan rua saling beradu pandang.
Si Mat tumpak terpesona... alang cindo bay sija, cakna lom hati dalihna ngucap iluy.
"Api pendapatmu pun ?... panuju mak nikuna di paduka tuan Putri ?!" butanya pengawal sina di Si Mat.

Si Mat mih tisongil cutik, pocak gupuh.... ya ragu kontu marik Putri Balamika nulak bakdu katahuman kok wat anggoman ditiyuh,... dipa mak ngusung toqon-toqon munih.

"Silahkan diaturi mojong !" cak panghulu sai kok mona mojong dibucu.

Ompai mojong sangrobok... mak uni kaniyan bangik-bangik disotarqo tian. Uwat sisu baruga timanggang, uwat pindang iwak puhal, samsam balang bisa, kampolang, bingka, tapai, samalingkung rik kotan, anggur merah-na, punti kayu, cuko kabung, langsak... sagala rupa kanian uwat disan. Tanihi Si Mat tumpak botoh daina.

Butanya panghulu di Si Mat : "Pun apiya niku besadiyo jadi laki Putri Balamika ?, sekalian jadi rajo kapalak istana Balamika ?!"

"Sabonorna sikandua.... sikandua.... sikandua besadio !" cak Si Mat nyimbat dalih pocak kilu sukana di panghulu.

Putri Balamika maha andongi cawa Si Mat. Ipon-na kanahan handak rata, bangukna munih horum... mak umbau potay hamak.

"Mon nikuna panuju di paduka Putri Balamika, acara ijab-kobulsa ga kita mula-i. Adok usunganmu na... maksudku mas kahwin sai tiusung ho api ?!"

"Nah makkung ongka pun !... hadot sikandua ratong tidija mulang jak nampas, jadi mih ngusung bosi cap gorpu rik candung bgawoh !" cak Si Mat mula-i mak bangik hati.

Panghulu ho busiop-siop di Putri Balamika, radu sina dalihna maha ... ya butanya luot di Si Mat : "Adok sai digalahmu-na, mon tijadiko mas kahwin dapok mak ?!"

"Ohh... sija ?! .... ija jimatku, mon dihagako untuk mas kahwin... akukda !" cak Si Mat dalih ngacaiko jimat jak galahna.

Singkat curita, akhirna tan rua jadi kahwin. Losai ijab kobul kaunyin tamu mongan nginum, bunyanyi, joget... pista busuka-suka.

Si Mat rik Putri Balamika kok kuruk kamar, angguwai acara khusus kabayan.
Dilom kamar sina tan rua ngobrol dalih sikubik-kubikan, sicikau-cikauan.

Jimat pangonjuk Si Mat kok dikotong Putri Balamika. Dalih andakok Si Mat, Putri Balamika kilu kapasang jimat sina dikarukqo ditanihi-na. Jaksan ya budakok muloh di Si Mat.

Dalih tan rua mihngot togak budakok kagusuk-gusuk ... kagusuk-gusuk, badan Si Mat laju sara ngahandop. Badan Putri Balamika malah sara ngison... sara ngoras munih. Tapak makai jimat sina, mak uni jaksan badan Putri Balamika ho laju ngoras nihan ambatu. Si Mat bolai tikanjotna... anying ya torus andakok dalih buharap kontu kondisi Putri Balamika muloh sediakala.

Sai diharapqo Si Mat mih sia-sia, ya laju tikahiwang : "Oyy... bakna niku laju jadi tanohsa dindoooo... !" cakna dalih torus andakok, jadi solsolan-na bakdu jimat sina jadi penyebab binasa.
Si Mat tiholpok budakok di balamika, ... ya antara sadar rik makwat.

Angin kuat rik hujan andosuh... suara tawak-tawak kadongian muloh, "... tak tak dung.... tak tak dung".

Bokahna rombongan Si Dul jak tiyuh ompai ngahalu pok Si Mat tijamot di talang sina. Tian buhodak nabuh tawak-tawak.
"Ajayya Si Mat !" cak Si Dul di rombongan dalihna modogi Si Mat.

Pungu Si Mat dikotong Si Dul dalih cakna :
"Payu Mat kita mulang.... kamahapan sikam kimbang lambat anjonguk niku. Niku ngalobon kok rua haranisa, ... sikam bukuliling nyopoki bokahna kahaluan dija !" cak Si Dul dalih narik pungu Si Mat.

"Nyak mak ga mulang... anggomanku, ... anggomanku balamika !"

"Anggomanmu-na ditiyuh Mat,... ijada balamika layon anggomanmu !"

'Makwat... ija Putri Balamika, yoja anggomanku sai ompai kukahwini !"
cak Si Mat dalih ngahoru miwang.

Si Mat laju lobon panghalu. Ya diusung rombongan Si Dul mulang haguk tiyuh. Dilobasi tian sampai akhirna hodak. Basa kok hodak bakdu liyom dijolma tiyuh, akhirna Si Mat laju ngarantau ninggalko tiyuhna.... antah haguk pa.