Mahitom Rik Nyiwi

Jolma bahari (tan muyang) pandai cara ninjuk mahitom di lom pulan.

Carana bijak nihan, mahitom ditinjuk tapi mak katan, totop hurik … munih sihat.

Mahitom jaman paija dirinokqo, di-ingun, tijuki mongan jaksan tilatih butakad nyiwi. mahitom sai kok rinok sudo pacak tikayon ngakuk buah nyiwi, ya butakad jaksan buah nyiwi diputilina rik kukut mae … “tuuum” tiak guk bah.
Sunipa da cara bahari ninjuk mahitom ?

Bokahkona diumpani tan muyang makai buah nyiwi (dugan) sai balag.

Buah nyiwi rua tolu bungkal titukak cutik (tilubangi), uway rik isina kinda boruhqo, isina tikolis pay radusina usung kuruk pulan, batokqo dibah batang kayu. Ponah… intikqo juga jak jawoh.

Amon dihalu mahitom sai sikor kabotohan, umpan nyiwi/ dugan sina dipodokina, jaksan tukak di nyiwi sudo dicolukina rik pungu haga ngakuk isina.

Mahitom tamtu kapayahan nyoluk isi nyiwi bakna lubang sudo mih ronik pas pungu bugawoh.

Basa pungu dikopolkona … mak pacak ticabut (sosog).

Nah… sikor pungu na ladas nyoluki buah nyiwi… lajuda huangko atawa tihojak : “huuuyy… !!, hatciiik … !!”

Tamtu ya tikanjot, anying ya mak pacak lijung gogah hadot kabiyakan ngusung buah nyiwi bakna pungu dikopolqona.

Samuni pungu tikopol, mahitom sina mak pandai tikucil jak lubang nyiwi mula ya mak pacak lijung jawoh.

Jadi tinggal ninjukna lagi. Sorbongko juga sabidang ombay dipudakna jaksan karokkok usung mulang.

Bangkali kita tikahaha …. amon ngaliak langsung cara minja (ninjuk) mahitom sapona.

Anying ina dapok tijadiqo pelajaran sai uwat hikmahna.

Ingok atawa mak ingok, … sabonorna pandai nindai badan diwik atawa ngahaha badan diwik…. bakna ?  kadang badan butingkah gohgoh anjuk mahitom kamona.
Badan diwik galak ngopolqo kuat-kuat kaunyin urusan gohgoh anjuk mahitom ngopolqo isi nyiwi lom punguna.

Mon badan risok koruk-kocong, mak mudah ngonjuk hampura, mak mudah kilu mahap.
Banguksa bangkali pacak ngumung ikhlas, … anying apuy rasa butong lokok baya nyalang-calang dilom dada. Badan mak bu-ijo ngalopasqo rasa butong sina, marik munih malah ngusungi "buah nyiwi" sina tidipa-dipa dalih lapah… badan congki kabiyakan.
Kolpah iwari, sabonorna mahitom kamudo pandai lolos lijung cangkolang amon tian-na haga ambukak tapak pungu sai tikopolqo.

Kira-kira, jolma anjuk sinada munih …. pacak selamat jak haban lom dada amon idang haga pedom (turuy) … badan ngalopasqo pay kaunyin "rasa mak bangik" disapa juga sai berinteraksi rik badan.

Mon makai cara sina, … mudah-mudahan jomoh pagi-na badan pandai ngaliak mata-harani disai-sai uncuk bulung tanoman pocak kanahan cindo, … kanahan holau.

Mudah-mudahan kaunyin amal ibadah taka silaturahmi online sija mongsa rohmat dan barkah jak Allah Swt…. Amin.

Wabillahit taufiq wal hidayah, warridho wal inayah, wassalamu’alaykum warohmatullohi wabarokatuh.