JAMBU DUMAN MOULI BUTA

Maranai botik, jujur, sikop, handak, gogah balag langgar... lapah ninggalko lambahan di tiuh. Halokna suntuk pikiran... ya haga nyopok pengalaman sai buhorti guwai hurikna jomoh. Ya lapah kok jawoh... tungguk di petalangan pulan sai isina lamon batang-batang kayu balag. Dibah batang kayu rindom ditopi cupang ronik ya buhodak pay, istirahat, ... mak uni jaksan ya laju tikaturuy dibuai lagu cangkorik, balang, bunyi bulung kayu disobu angin dalih dirayu-rayu bunyi aliran uway sungai/ cupang ronik dikabolahna.
Basa kok nginongan badan rasa bigar anying tanihi mula-i botoh. Api sai haga tikanik, sangu mak ongka, kawil munih mak tiusung. Sikor ya ngaguk-aguk kabotohan ... diliakna sanga bungkal buah jambu tihanyuk diusung uway. "Hah... ajayya uwat pangisi tanihi !" cakna lom hati. Buah jambu sina dihambakna, malur, siau, pocak mamis munih, tumpak karatap-karutup dikanikna.
Jambu sina ompai bola kapolok, ya bakna jadi sadar. Lom hatina : "jambu sija mosti uwat tuan-na, bakna buahsa laplup kukanik padahal nyak mak amit pay di jolma say ongkana".
Hati maranai sina mula-i rasa mak bangik, bakdu ya rabai kintu kasalahan nganik jambu duman hulun walaupun mih kapolok laju ga jadi dusa.
Maranai sina laju lapah ti arah hulu maksudna haga ngahalu-i jolma sai ongka kobun jambu.
Mak uni jaksan diliakna uwat bakas tuha bukawai burak, butudung rumbai-rumbai sikor macul dikobun. Bakas tuha sina di podokina : "Tabik-pun... sikandua ratong dija haga kilu ihlasna bakdu buah jambu pun sai kuhalu dudo kok kupakanik kapolok, ... mula sikandua ratongsa haga kilu mahap !"
Cak bakas tuha sina : "Alang bangikmu, jambuku kok dikanik niku ratong mih ga kilu mahap ! Nyak ompai ngonjuk mahap amon niku bugawi macul kobun sija pangaji tolu bulan !"
Bokahna maranai sina sanggup narima sangsi. Tapak jak sina ya jadi tukang macul kobun. Ya rajin bugawi, mak lamon tingkah... walhasil kobun bakas tuha sai diurusna jadi holau, tanoman tumbuh hujau hingan.
Mak karasayan waktu tolu bulan narima sangsi jadi tukang pacul kok losai. Maranai sina haga amit mulang : "Pun ganta kok waktuna sikandua bibas, jadi kabiansa sikandua amit haga mulang !"
Bakas tuha sina anjawab : "Tahan pai niku mak dacok amit dinyak... hadot jambu sina layon dumanku ina duman anakku, jadi niku amit juga dianakku !"

"Sunipa carana tulung cawako juga pun, jambu sai konjak kukanik ho kilu sukana juga !"
Bakas tuha sina ngahalu-i anakna dilom lambahan. Mak uni jaksan ya luah muloh dalih cakna : "Anakku mak dacok ngonjuk amit diniku, cawana niku harus ngahwini ya... didongi !!!"
Bakdu maranai sina rabai di dusa, ya nyanggupi ngahwini anak bakas tuha sina sai makkung kala diliakna samuni ya bugawi disan.
"Payu pun... sikandua sanggup asak sikandua lokok dijuk hurik dijuki hampun !"
"Tarimakasih niku kok satuju, ... anying niku kujuk pandai bahasa anak morliku na buta, bisu, munih mak dacok lapah bakdu ya udo lumpuh !"
"Pahagana pun sikandua kok nganyatako sanggup, ... jadi sanipa juga keadaanna sikandua narima juga !"
Basa ompai tian losai ijab kabul, bakas tuha sina langsung ngayon si maranai kuruk kamar anak morlina, cawana : "Halu-i da morli buta, bisu, lumpuh dilom kamar sina, ya kok syah jadi anggomanmu !"
Si Maranai torus togak, lapah nuju lom kamar. Ompai ya nyingkakko kalambu... alang tihuang hatina. Morli sai diliakna cindo nihan, buok tojang ikal mayang, dagu lancip anjuk salai tabuan, handak mak biluahan, inggona laksana bidadari mak ongka tandingan. Mempelai bay sina nyambuk ya dalihna ngumung : "Halo yank... guk jada kita mojong mojong lom kalambu !".
Maranai sina tumpak cingkolang luah jak kamar, lom hatina kintu ya salah kalambu. Ya ngahalu-i mantuha, cawana : "Pun... morli sai dilom kamar sina layon anggomanku, ... hadot anggoman sikandua buta, bisu, munih lumpuh. Morli sina sihat cindo... maongka cacatna !"
"Mantuku... sinada sabonor-bonorna anggomanmu, ... dumanmu, kancamu busuka-suka !. Sai cawaku ya udo buta, bakdu ya mak kala ngaliak porno grafi, porno aksi. Sai cawaku ya udo bisu, bakdu ya mak kala ngumung jahat atawa ngrumpi. Sai cawaku ya udo lumpuh bakdu ya mak kala luah jak lom lambahan !, ... sinada anggomanmu" cawa bakas tuha sina.
Maranai sina tihonyak.... alang suka hatina dibingi torang bulan sina ya mongsa rajoki balag.
Sinada imbalan bagi maranai jujur, borsih hati dan berserah diri.