MINGI DI TALANG

Ngiram puasa dilom pulan... Lubuk Bhu. Paija basa sauni bulan puasa sanak sikola libur. Libur puasa nyak rumayok ti Kampung Salawi Campaka. Ompay kabian ditiuh diajak tan mama kuruk pulan. "Kita mingi di lubuk Bhu juga !" cakna dinyak. Uwat panghuman dudo say pari na mula-i haga kuning, jadi porlu di tunggu sampai pacak anggotas mae mak dihona-i raja pulan.
Jak tiuh sikam puluh (taka ombay rik akas iyot munih) lapah kukut rua nga jam. Pulan sina hongon, kadang-kadang sikam andongi sisu baruga korkuk, kadang kadang kadongian suara lambas sikor sicikau-cikauan. Agas munih andonging alang lamonna.
Waktu sina pas bulan puasa. Jak tiuh kok ngusung bias, siya buku, sagalo humbu-humbuan paranti mingi pangaji saminggu di lom pulan. Idang hari gawi sikam ambancah di huma. Amborsihko munih jukuk dikobun say lamon ditanomi lamasa, jambu, kadundung, rambutan rik langsak.
Dilom pulan sina uwat sapu sapu balag tingguai tan akas, isina mih sanga lambar bawak manjangan sai kok tingoluhqo paranti sulan pok turuy.
Cangkir pinggang mak ongka, hadot risok kalobonan basa ditinggalqo di sapu sapu, entah sapa sai ngamalingna, api lambas, jolma ... apiya diakuti hantu... mak jelas. Mula basa haga mongan sikam mih makai pinggan jak bulung punti, basa haga nginum makai baka jak buluh... walhasil kondisina bonor bonor alami tulen.
Dilom pulan sina basa jam pitu pagi ompay kanahan torang, anying mon kok jam pak dibi mula-i manom. Nyak mingi lom pulan mih rua bingi kok lisah kacah haga mulang guk tiuh. Kamunian di lom pulan suntuk, buntu akal, mak bangik bak badan tibiaso hurik ditongah kota.
Walaupun sibuk ngahotosi huma rik kobun, sikam totop puasa. Jam beker, jam tangan apilagi henpon ... maongka. Patokan waktu mih ngandalqo mataharani. Basa mataharani siau na maongka lagi berarti magorib. Basa sisu kok rogoh jak kandangna berarti subuh ompay losai.
Dilom pulan sina paling saro haga namtuqo waktu imsak, hadot waktu imsak sudo kira-kira mih lima monit samakkung waktu subuh.
Jadi waktu sina, sikam radu nyawor (pungu lokok basoh umbau tampuyak) mojong-mojong di ijan dalih ngudut, ngopi rik bukalakar. Mak uni jaksan kuliak sisu kalabay rik anak-anakan na kok luah jak kandang nyopok mongan. Cakqu di tan mama : "Biasona mon ditiuh, sisu rogoh jak kandang ... barong rik ustad ngunci rawang masigid".
"Iyu... berarti ganta kok subuh, umbanko da rukuk kutina !" cakna dalih anjorit : "... imsaaaaak !, ..... imsaaaak !"
Sikam kaunyin halokna nyawor kamawasan anying bakdu lom pulan, mudah-mudahan Allah Swt ngamaklumi kondisi dan narima puasa sikam... Insya Allah.
Sinada pangalaman sikam ... puasa lom pulan di Lubuk Bhu.