KALABAY HALOM VS MUSANG

"Sapa haga andongi curita, pae hagukja !" ... cak ombay disikam paija.

Andorup... walu ompuna tikuruk nyak ratong kaunyin dalih lijung ngamodok lamat pok ombay gulig.

"Curita api mbay ?... laju mula'ida mbay !" cawa du ompu-ompuna kok mak sabar lagi.

"Sabar... ponah pay ! cak ombay dalihna mulos buwok sae handak lah huban. Kuti dang buhodak ngayot kukut rik pungu ombay mae ombay lanjut curita yo...?!"

Sikam kaunyin kok ngakuk posisi. Sanak pak sae ngarok-rok kukut, sanak pak lagi ngarok-rok pungu ombay.

Sae tolahna sanak ronik ... ngarok-rok sahaga-haga. Tan mamang rik bibik mih tisongil ngaliak ompu ngarok-rok ombay tian.
"Dibingi sa ombay curita KALABAY HALOM... kuti kok pandai mak kung ?" tanya ombay di ompuna.

Ompu say kok sikola anjawab : "Pandai mbay ... sisu say buluna hirong !".

Ombay ngamula'i curita ....
Jaman paija sisu kalabay sina ongka anak puluh. Bulu anak anakna kaunyin kuning.
Mon dibingi lokok kanahan warna kuningna anjuk ipon si Mat.

"wakakaka .... wakakaka...!!", laju maha kaunyin ompuna, suka nihan sikam andongi kalakar ombay.

"lanjut .... mbay !", cawa ompuna sai paling ronik.

Nah .... sisu kamudo ngaman dihuma, basa kok sorop ibi hongon. Tian kok mula'i nyangkak lom kandang sai ma-ongka rawangna.

Dibingi sina bakah kok di-intik musang. Sikor kalabay rik anak-anakna turuy landok, musang laju nguruki kandang sisu.

Diliak musang sina rua anak sisu bulu kuning nyohngul huluna jak bah galupah indokna... ya laju dicoluk musang : "carotuppp... !!"

"ciaaap ... ciaaap ... ciaaap !", anak sisu sina nangkorik diusung lijung lah musang.
Kalabay sina mih ngutak-kutak...
"Petoook... ptoook .... ptooook !!"

Tapi sayang ... ma ongka kanca tian say ratong nulungi ditongah bingi manom hongon sina.

Ombay buhodak sang robok... sambil ngahotosko sabidangna say kimbang tigayak.

"Lanjut mbay !".... cawa ompu say numur pak mak sabar andongi sambungan curita.

"ciaap ... ciaap ... ciaaap !, anak anak sisu ganta tinggal walu ... laju miwang kaunyin.

"Kalabay ho munih tikeluh ngorop-ngitop ipon-na sambil ngahojak : "musang ! ... ponah niku, pinsan lagi mon ratong kuponahko batu !" ... cawana sambil ngahoru-horu ngahiwangko rua anakna say kok dibang-bangko musang sina.
Tapak jaksan, kalabay sina ngatur siasat.
"Kita ngalih pok sae kimbang aman !" ... cawana di anak-anakna

"Ngalih haguk pa ... ndok ?"... butanya salah satu anakna

"Kita angguwai sangkak anyar juga !, ... kita gawiko jama-jama." cak kalabay halom dianakna.

Sanga kabianan tian nyalosaiko kandang anyar. Kandang anyar ho lokok umbau bulung-bulung punti rik jukuk hujau. Jadi mon tian mingi di pok sina aman, badan sisu ho mak dipaumbau musang lagi.

Kalabay ho nyawako di anak-anakna : " mon kok sorop ibi dang lagi diluah, nyangkakda hadot diluah lamon musang nyopok pamongan, dang sampai kuti dikanikna !"
"Gawian kita tinggal sangbungkal lagi !" ... cawa indok sisu ho dianakna.

"Apa lagi sae ga tiguwai... ndok ?!" tanya sangbungkal anakna

"Kita guwaiko pinja untuk musang sina !" jawab kalabay ho di anakna.
Batu panggirik siya, disalok kalabay sina rik baruk. Dibatokkona lom sangkak sinangun.

"Nah !... ompay losai gawi kita, tinggal monah kontu dibingi sa musang ho ratong luwot". Cawa indok sisu di anak-anakna dalih dirandanna kuruk sangkak anyar.

Ompai haga tisilop, ... pandai-pandai kadongian bunyi musang lumpak jak unggak batang langsak. Musang gomuk sina laju ngamodoki sangkak sisu.

"Sssstt... rokopp !!!", cak kalabay sisu dianak-anakna.
Anak-anak sisu ngarokop kaunyin karabaian di musang. Anying mata kalabay rik anak-anakna mak ongka sai tipodik. Tian kaunyin ngintik musang sina jak sangkak anyar.

Diliak tian musang ho kok kuruk lom sangkak sinangun.... siap norpau pinja, padokimak pangrasana sisu sikor turuy. Banguk kok dinga-nga kona siap ambawoh, pandai-pandai : "carotuuupp ! ... waddooooouuu !!" .... huukkkuuu !".

"Hadoh !... bola pungkoh iponku !, ... hicks... hicks... hicks !, mak pandai lagi nganik daging sisu.... hicks, ... hiks !" cawa musang ho miwang kasakitan dalih luah jak lom kandang sisu. Mak uni jaksan ya laju ngalobon kuruk lom pulan.

"Horeeee.... musang kena batunya ... horeeee !!" cak sikam sambil ninggalko pok katuruyan tan ombay.

Tan mamang rik bibik ngaraso tiganggu, ... mamang nyingkakko kalambu dalihna ngahojak : "hoeeyyy.... rokopda kutina, kok dibingi mak dapok anjorit-jorit !"

Sikam mih maha bgawoh.... hahaha.
(by Galihway)