LAJU TIKALIDAU

Di lobak sai hongon jawoh jak tiuh munih, jolma rua mihngot ngaman dunggak sapu-sapu. Bakas sai makkung tuhaga rik anggomanna nunggu huma mae mak dikanik raja.
Minggu sina ya haga lapah nyopok iwak. Ya ngusung biduk ronik dalih ngajak si Bleki asu ingunan. Anggomanna mak miyot mih nunggu sapu, dibakako anggomanna kan makai bulung punti, jaksan sia buku rik caluk cutik. Mih sina bugawoh mak ongka gulai barih. Ya buharap anjala mongsa iwak, ontini haga tipul-pul paranti gulai mongan.
Ompai ya amit dianggoman haga lapah anjala, uwat iwari singgah ngonjuk pandai bahasa ya pagi sina mongsa rua undangan. Undangan kolpah sai ngaman dihulu ... acara sidokahan nyambolih sapi. Undangan kolpah barih lagi sai ngaman di liba... acara sidokahan hoda anying mih nyambolih kambing.
Bakas sina tumpak maha bakdu ya bakal mongan bangik, anying ya kimbang bingung hadot karua-rua undangan ho waktuna gohgoh. Uni ya bupikir... "Mon nyak guk hulu juga nyak bakal mongan gulai sapi, anying tanihi sa bakdu sikor botoh mak kuat ngayuhqo biduk ngalawan aliran uway. Mon nyak guk liba ... mih gulai kambing, sabonorna mak halokga".
Ya ngakuk kesimpulan haga ngaratongi kaunyin acara mongan bangik sina.
Ya laju ngajak si Bleki cakaq biduk nuju hulu. Uway sikorna balak munih, jadi ya bukayuh dalih ngongkoh. Bokahna takala ya tungguk, ... acara kok losai. Kari-kari liyom ya bubalik haga ngaratongi undangan sai na lagi. Bakas sina bukayuh hoji (ngobut) nuju liba.
Takala ya tungguk di pok kaundangan sai di liba sina... bokahna kok jak jona losai munih. "Huuuhh !... kasihan nikuja Bleki, ... kabiansa mak kabagian nganik gulai bangik !"... cakna ngumung di asu dalihna ngelap hiting. Apa boleh buat... mon makkung rajoki haga sunipa lagi. "Kita anjala juga !" cakna luot.
Bakas sina rik asu halom-na laju nuju lubuk. Basa kok tungguk di lubuk pindua-pintolu ya niakqo jala. Bu ulang-kali narik jala... anying bakdu pas mak musim jadi mak munih mongsa iwak.
Lom hatina... kintu pinsan motakqo jala sija ompai mongsa iwak, ... ronik-ronik jadida paranti tawok mongan ngisi tanihi sai kok botoh nihan.
"Caloguuuumb !!" ... jala ditiakqona diway, ompai haga ditarik bokahna tisangkut dihuwi. "Naa munih !"... cawana lom hati. Mau tidak mau... ya laju bukacambor haga ngahotosqo jala sai tikahik.
Halokna... bakdu dunggak biduk asu mih posai-posaina dipa botoh munih. Sikor tuanna busolom, asu sina tumpak ngaikai kan sai tibungkus bulung punti ho... dikanikna laju hinik.
Jala kok tikucil jak pengahikna, bakas sina laju cakak muloh dunggak biduk. Basa diliakna ... kan sai tisalok kok tikucicak dikaikai asu. "Ayy... nikuja, laju tikalidau gawisa !"... cakna dalih nyintakqo pangayuh.
Si Bleki laju dibotuna rik pangayuh biduk : "...caloguuub !, ... caloguuub !".
Asu halom tikacambor di way dalih nangkayung kasakitan : ".... kaiiiing, ... kaiiing !".
Inggona lobak di harani minggu sina laju rami ... lah suara asu nangkayung.