LIMA SEN PADUKA TUAN

Curita kisah tan Akas Umbuh idang musim 17-an.
Kuti ja ganta bangik, cakna ... Mongan nginum gonok, .... pacak ngotong hape, ... pacak komputer/ internet (facebook), sagala rupa uwat tisadio.
Mon jaman sikam ngura paija... pass jaman dijajah Balando, bias sokod, ... pakaian sokod, lobas-lobasan sokod, ... mongan-nginum saro. Tubuh bujamot lom pulan lokok disopoki Balando.

Waktu sina bak di tiuh bias pandok bola, Akas Umbuh diajak Batin Kamal, kakakna sai serdadu gurilla pokowasi (evakuasi) kuruk talang haga ngunjal bias diatod guk tiuh. Dalih ambukak kobun hubi kayu dilom pulan, tian mingi disapu-sapu sai diguai langgar dunggak batang,... saminggu pinsan ompai mulang tiuh. Batin Kamal bak ya udo serdadu jadi idang harani ulang uloh talang-tiuh, ... Akas Umbuh risok ditinggalkona posai-posai.
Sikorna gulik disapu tongah harani, kadongian uwat suara joma andudu : ".... wooooiyyy !".
Bakna munih disimbat Akas Umbuh : "...sapaaa yoo !" Pangrasa sai andudu sudo kakak atawa iwari utusan jak tiuh,.... bokahna Balando tolu ngabungkal sai ratong !
Jak bah sapu-sapu Balando mula-i ngahojak : "... hey kamu olang cepak tulun heh !... atau yey tembak itu kamu punya pantat !"

Akas Umbuh bugancang rogoh jak sapu, tungguk dibah ya digeledah Balando dalih dikayon balik badan masang karuyung. Sanga bungkal Balando cakak sapu-sapu, sagala jamot-jamotan dilom sapu-sapu dikujal-kujalina. Balando ngahalu bobot gurilla (gerilyawan), laju ditiakkona guk bah. Mula-i tian ngahojak luwot : "... lupanya kamu olang ekstremis yah, apah ini sabuk kamu punya heh ?!" Bobot sudo sabonorna duman Batin Kamal, mih amon ticawako ... kakakna bakal gawat dan congki diunut Balando.
Mula Akas Umbuh nyimbat supoja : "... itu sabuk punya saya Paduka Tuan, saya dapat beli di kota".
"Hoh... baguz,... baguz !... ehh blapa halga ini sabuk kamu beli heh !"
"... lima sen, paduka tuan !"
"Apah ... kamu olang bilang lima sen !" Cak Balando sina dalih ambitasqo bobot dikaruyung Akas Umbuh pin lima. Radu sina ditawan tian, diusung tian lapah nuju lobak, halokna ga di-eksekusi tian tapi gagal lah dihadang serdadu gurilla Cempaka.

Balando ratong guk Cempaka ngaliyu'i lobak jak Gunung batu, anying kehadiran tian bakah kok diintikqo serdadu gurilla (gerilyawan). Balando tolu sina tisosak bak rang raya mak lagi kanahan dirondom way pas banjir bandang. Mak uni jak san serdadu gurilla kanca-kanca Batin Kamal sambil bujamot dibalik-balik batang kayu ngonjuk instruksi bubahasa balando sai kira-kira hortina :
"Perhatian !, ... perhatian !, harap nyorah !, ... kuti ganta kok sikam kepung, mon mak haga nyorah burondom da kuti sampai jomoh pagi. Dilobakho lamon buha, kutina pandai mati dikanik buha. Tapi amon kutina nyorah onti kuti mih sikam tawan !"
Balando sina nyimbat : "payu mon juk sapona sikam nyorah !".

Mak uni jak san tisungsungko biduk sang bungkal makai bandira handak, Balando rik tawanan diajak cakaq biduk nuju posko serdadu gurilla. Tolu balando  sina kok tiacungi sinapang, tikayon angkat tangan. Pistul rik sinapang tian ti rampas, ompai tian tolu sina tikaruk kaunyin.

Jomoh pagina tikabar di tiyuh Balando tolu mati kasambolih, buntangna tihanyuk dibatang-ari. Curita Akas Umbuh dalih ngajak ompuna lapah-lapah ngaliak acara panjat pinang dalam rangka HUT RI tingkat erte.
Mardikaaa...!