MIDANG-MIDANG BUTANDANG

Midang-midang di talang,
Pahalu kobun karit.
Bulungna tikulibang,
Gitohna jadi duit.

Midang-midang maksudna lapah-lapah mak tamtu tujuan, bangik yona guai refreshing mae pikiransa borsih dan nambah wawasan. Sara risok midang-midang, sara lamon sai dikapandai.

Cawa tombay... ija dongeng sebelum bobo. Kisah Labi-labi, midang-midang rik Kuwak-kuwak.

Kintu uwat sai makkung pandai di Labi-labi, yona Bulus atawa Kura-kura.
Mon Kuwak-kuwak yona, manuk sai galak kaliakan dihuma. Kuwak-kuwak galak nganik anak iwak gohgohda rik Labi-labi. Jaman paija (samakkung uwat internet) tian rua sina bukawan, galak situlungan, galak saling jonguk munih.

Kala sina Kuwak-kuwak singgah di lobak pok Labi-labi nyopok pamongan.

"pi kabar sabai ?" cakna di Labi-labi ambuka obrolan pagi.

"Botik... sada !, uni nikuna mak singgah dija, ... jak midang-midang dipa halokna ?" Labi-labi nyimbat dalihna ngaluahqo kanian... anak saluang.

"Nyakja ompai ratong jak lapah jawoh, ngalintas patiuhan, ngaliyu'i lamon sungai rik pulan-pulan".

"Aehh... bangiknanna sada, ajak pai nyakja midang-midang pinsan sa kala" cak Labi-labi mirotok ngaliak patiuhan barih.

"Kapan-kapan dapok hodda sabai... anying sunipa carana, hadot niku maongka kopi anjuk sikam" cak Kuak-kuak.

Radu jama-jama botong nganik anak saluang, ... Kuwak-kuwak amit di Labi-labi : "Onti kupikirko pay cara ngajakmu torbang sabai... ganta nyak amit haga ngalanjuk karindanganku sai sikor nohluy".

Kok tungguk disalay karindanganna, Kuwak-kuwak sina ngonjuk pandai bahasa ya haga ngabulqo permintaan Labi-labi torbang midang-midang ngaliak patiuhan barih.

"Ya udo botik nihan dinyak, galak ngonjuk iwak-iwak ronik... jadi nyak ga ambalos kebaikanna, cawa Kuwak-kuwak dikantikna sai paling cindo sanga lobak borak sina.

Disimbat kantikna : "... mudah ina qyai, mon ya udo mimang haga ... ontini kita rua ngusungna torbang !".

"Anying sunipa cara norbang kona ... yank ?" tanya du Kuwak-kuwak bakas.

"Akukqo puntung ronik, kayon Labi-labi ho bukotong disan, ontini kita rua ngangkatna guk unggak !", ... Kuwak-kuwak bay nyimbat dalih bukasona.

"Labi-labi ho khan punguna mak pandai ngarokkok ngotong puntung, ... ina makda mungkin yank !" cakna luot di kantiqna dalih nyoksok sanga bungkal lindung ronik.

"Ngapi ga mak pandai qyai.... kayonko ya ngotok puntung sina, jadi ya bukotong ngandalko ipon-na ... paham !" ... Kuwak-kuwak bay anjawab dalihna busual.

Kuwak-kuwak bakas mula'i tibukaq akal, ya bungga radu dikantiqna sai pintor ... cindo munih.

"Tuon cakmuna yank.... hibad nihan, ... ija ide hibad !" cak Kuwak-kuak bakas dikantiqna.

Jomoh pagina, Kuwak-kuwak bay kok nyiapko puntung kayu ronik, hampang tapi kuat. Dijuk kona di Kuwak-kuwak bakas.

"Kabiansa juga kita manjau ti lombahan sabai Labi-labi, ... mon jomoh pagi ina kok jadwalku haga ngahorom !", cak Kuwak-kuwak bay dalih nyalok rua ngabungkal hantoluyna rik jukuk.

Kuwak-kuwak bakas hambor ngusung puntung kayu disusul kantiqna munih jak buri. Cuaca kala sina torang makwat mondung. Manuk-manuk barih liyu-limbar ngusung pari. Kaliakan munih jak langik, Borang-borang bintung balanyang sibuk andandani pamatang.

Mak uni torbang akhirna tian tungguk di salai Labi-labi.
"... bai, .... sabaaai, minjakda payu kita midang-midang !, ... bakna nikuna kamawasan, biasona subuh niku kok di Lobak !"

Halokna Labi-labi kabotongan nganik iwak saluang, laju ya ompai pacak minjak magi-pagi.

"Niku bukotongda dija, kotok puntung kayu sija rik ipon-mu... ontini sikam rua ngotong uncukna mae laju norbangko niku guk unggak", cak Kuwak-kuwak bakas di Labi-labi dalihna ngonjukko puntung kayu ronik sina.

"ohh my god.... sapoja bokahna cara sada nyiapko paranti ngajakku torbang", cawa du Labi-labi bolai sukana. "Payu mon mimang sada pagisa haga ngajak midang-midang, nyak siap !, cak Labi-labi dalihna ngobokko rawang lambahan.

Basa puntung kayu kok dikotok Labi-labi,... Kuwak-kuwak rua sina laju ngangkat kona dalih ngopak-kopakqo kopi.
Laaapp !.... lajuda tian tolu torbang mengangkasa.

"eeey... hampang bokahna badan sabai ja !" cak Kuwak-kuwak bay di Labi-labi.

Uni tian torbang ninggalqo lobak, bokahna nuju Pulimbang.
"Sabai... sijada say cak tian tolahna Kota Impik-Impik, kita sangrobok lagi nyuksuk kolong jembatan Ampera".

Wuuusss... tian torbang makai formasi "surampang nujah busung", angguwai manuver sai kimbang beresiko, mon mak lihay pacak tisanggak dipingping jurambah atawa tipatumbur hatok motor ketek.

Jolma ditopi pasar nombolas bola tihuang... mih ginca.
"Apo dio tu tadi, bedelap nyuruk bawah jambat !"... cak tukang asongan impik-impik.
"Aeh biaso be itu khan burung khuntul dari Kemring... pecaknyo", bibik tukang kampolang nyimbat sahagana diwik.

Kuwak-kuwak ho mih maha andongi komentar tian. Penerbangan sina laju ngarah haguk Palaju rik Sungai Gorong, ngaliyu-i Boom Baru jaksan Pusri. Bupotor munih tian haguk Tanjung Siapi-api.
"Sabai ... kita ganta uwat dunggak kawasan Pelabuhan Samudra sai paling balaq disepanjang Pulau Sumatera. Sangrobok lagi kita ga nuju lintas timur ngaliak-ngaliak kobun sawit borak disan".

Sabonorna lamon sai haga ditanyaqo Labi-labi... anying bakdu bangukna sudo ngotok puntung beresiko bahaya mon tibukakqo, mula ya ngarokop bugawoh mih ngahaning api cawa Kuwak-kuwak, kadang-kadang risok haga maha anying ditahan kona judayya.