NGAWIL BUHA

Di Mandala uwat sungai ronik borakna mih rua mitir, anying disan lamon lubuk pok iwak bujamot. Dipa pok lamon iwak, biasona galak diratongi buha.

Sikandua lokok mojong dunggak sapu, pandai-pandai tan akas andudu : "san.... asan !, liyak pai isau dilom kranjang muna... uwat sai ngaykay-na".

Sikandua rik pak lobu Asan laju modok pangkalan haga nyolik, ... bokahna uwat rua Buha sirobut isau. Bisa sai dirondomko pak lobu Asan lom kranjang jona pagi.

Keranjang sina ditarik-tarik buha, ... isina bola tiluah laju dikanik buha sina. Buha sina mak uni laju nyolom.

"Aey... haga kukawil ontini kutina !" cak pak lobu Asan pocak butong.

"Uwat kawil balag di niku kyai ?"... tanya mang Usup di pak lobu Asan

"Ma-ongka kung... ontini kita angguwai juga makai besi behel, dibah sapu-sapu uwat behelna !" cak pak lobu Asan

Behel setengah mitir ditoktok tolu. Uncukna tiasah rik kikir mae tajom. Pangkalna tikulokko paranti ngahikko tali nilon balag. Tali nilon sina tojangna sekitar puluh mitir.

Kok sorop ibi persiapan ngawil dimula'i. Umpan kawilna bawak Bisa. Mata kawil dibulotko dilom umpan. Radu sina ditiakko diuwai. Uncuk tali ho tikarukko dibatang nyiwi rodik sungai sina.

Jadi istilahna titajurko bgwoh, makwat titunggu, mih dikonaiko bgawoh.

Tongah bingi sikor bangik-bangikna ngobrol,.... kadongian suara kalontum-kalontum di uwai. Anying bakdu suasana manom jadi tirokopko bgawoh.

Mama Sip nyuarko bolor jak unggak sapu-sapu.... "halokna kok kona kawil buha sina !" cakna dalih maha.

"Amanko juga sip !, pagi-pagi ompai kita angkat !" cak tan akas
Pagi-pagi radu burusap... sikam ngahayak sarapan pagi, nasi goreng sua hati Bisa.
Eiiy... sodop nihan tasakan ombai sikam. Nasi goreng sudo dijukina munih katumbar rik caluk cutik.

Losai mongan nganik limau rua ngabungkal jaksan laju ngopi rik ngudut.... waw, alang bangik hurik dihuma. Nyak ngebayangko kanca-kanca di grup FB Oku Komrink... pangrasaku tianna mak ongka sai tahan mingi di huma, tuon daina, lom hatiku laju nyakna tikahaha.

"Dang nomon ga ... ngalamun ho, payu kita rogoh anjonguk kawil buha !" cak pak lobu Asan dalihna nopuk karuyungku.

Tan ombay rik bik Munah ngahotosi pinggan-pingganan, radu sina rongokna haga norusko gotasan.

Sikam sai porda bakas bola rogoh jak sapu, nyak kok ngotong candung. Pak lobu Asan kok nyintakko surampang. Mama Sip rik mang Usup ompay ngalopas sabidang. Tan akas bgawoh sai lokok pas-pus ngudut, beliau udo sebagai komandan. Sai barih mih nutukko parintah.

Mang Usup ompai haga ngalopasko tali kawil sai tikahik dibatang nyiwi, ya laju ditoriko tan Akas... : "Tahan pai sup !, kita ngatur strategi pai, dang saruntuk-runtuk ho !" cak tan Akas dalih ngumbanko puntung rukukna.

Sikandua rik mang Usup ditugasi Akas ngotong tali kawil laju titarik sampai buha sina ticakak di tobing.

Mama Sip tukang botu-na. Pak lobu Asan tukang kancak-na makai surampang.

Selesai jak pengarahan sangrobok sina, sikam mula'i ber-aksi.
Tali kawil kok dilopas mang Usup jak batang nyiwi. Halokna karasaian uwat getaran tali kawil, buha sina mula'i muntala. Sikandua laju miyot ngotong tali kawil.

"Ayoo... satu ... dua !.... tariiik !" cak tan Akas ngonjuk instruksi.
"Kalontuuumb !!"... buha sina buputor. Huluna kok kanahan ticahngul. Sikam tarik torus ... ya laju ticakak ditobing.

Gundangna dibitaskona guk kiri kanan. Panci rik kawali sai lupa tisingkirko bakdu makkung losai tibasuh, laju tipotak kona bitas gundang buha halom sina.

Pandai-pandai ... caakk !, galah buha sina kok dikancak pak lobu Asan. Sikorna ngalubuk-kalubuk... ya laju dibotu munih lah mama Sip rik kayu gelam.... "caloguuubb !..... caloguuubb !".

Eksekusi selesai.... buha sina kok tikapkap. Balag nihan buha ho.... pandok rua mitir. Uyakna kanahan ngantil-kantil... halokna ina buha bakas.

Tapak ninjuk buha sanga bungkal di lubuk sina ... nyak laju rabai mandi dipangkalan. Hadot dilom uwai mosti lokok sanga bungkal lagi ... buha bay.
Weeeeww... rabai oiy !