USIN HALIMAWONG

Subuh dihari sina, Akas Usin lapah posai-posaina haguk talang haga nampas gitoh karit. Ina kok jadi gawina idang harani disamping ngahuma.

Si Mat, kancana jama-jama nampas kabonoran munih kimbang sungkan lapah kuruk talang bakdu sanak ngura sina ompay ngabayan (bulan madu lom kalambu), ... jadi ya udo kacah losu-losuan. Mula pas didudu Akas Usin jak bah lambahan, ya icak-icak njuk-mak bgawoh.

Malah anggoman-na sai nyimbat :
"Mona da kas !, ... ontini qyai nyusul jam sambilan !" cakna dalih ngubik bihngom si Mat. Si Mat mih tisongil kagoringan, ... kubikan pungu anggoman dirasaina halus bakdu ya jarang bugorok.

"Payu ... mon njuk sina cawaqo juga di Si Mat... nyak kok mona !" cak Akas Usin dalih lapah ngusung candung.

Anggoman Si Mat, lumayan cindo... kira-kira himbasna mak sijawohan njuk "Dwi Porsik" sai risok maen sinitron.

Naa... mon Si Mat, tikuruk tipe pemuda harapan pemudi. Badan balaq langgar, body building... bakdu ya risok ambabai karuntung. Kira-kira sanga pantar rik "Ade Ray"... sai binaragawan sudo. Ditiuh tan rua sina termasuk pasangan ideal.

Tian rua mihngot ompai luah jak kalambu, cak Si Mat : "Akuk kopai anduk, talosan rik sabun, nyak ga pangkalan !".

Kimbang liyom mon tan rua mandi barong, mula Si Mat lapah pangkalan mona.

Podok ijan pangkalan sihaluan munih rik jolma porda-bay lokok kaminan, wat munih nakan-na sai kok losai jak bubasuhan. Si Mat laju ditoriqo tian :

"ae Mat roja-rojamu minjak kamawasan, biasona subuh niku kok pangkalan".
Cak misan-na munih : "nah.. namonyo jugo penganten baru, wajar be bik mon dio-ni kesiangan".
Si Mat mak menanggapi, ya mih maha dalih cakna : "payu kutina gancangda mulang, pusimbang makai pangkalan sa... hehehe".

Ti ingok di janjina jona haga guk talang nyusul Akas Usin, ... mula Si Mat laju bugancang mandi. Radu mandi junub, ya bu anduk bu kawai ... siap mulang.

Ompay haga ninggalqo pangkalan, pahalu munih rik mama-na.
Tan mama ngonjuk pandai bahasa talang karit sudo minggu sija kurang aman, bakdu uwat pasangan halimawong sai anjalang kok ninjuk sanga bungkal kambing duman jolma sai ngaman ditalang.

"Jadi mon niku mak dapok mak... kabiansa ga guk talang, hati-hati juga Mat !"
"iyu mama, tarimakasih koq marikah"... cak Si Mat dalihna lijung-lijung mulang.

Midang-midang di talang, ... pahalu kobun karit, ... bulungna ti kulibang,... gitohna jadi duit...
Akas Usin bu senandung dalih mboruhqo gitoh dilom imbir. Pudak ditampokna rik sorban mih kanahan mata... hadot umbau hasok amoniak busukna lohmadopak. Gitoh sudo basa mak tijuki Amoniak pandai mboku, horgana rogoh. Anying mon pandai tijual keadaan cair, horgana holau.

Akas Usin butitawai di Dul Gitoh ilmu kimia pengolahan karet hadot Si Dul luahan SMA IPA. Lokok diingokqona pelajaran sina di talang, layon dilom kelas. Si Dul nulis curat-curit di tanoh, ngonjuk pandai supoja :

"Kas... ajayya rumus kimia larutan Amoniak :... NH4OH, yoja gunana untuk mencegah mae gitoh mak gancang mboku, asam karboksilat harus stabil, mae incir gunako konsentrasi 25%, boruhko lom gudu palastik sai nandok dibatang karit sudo !" cak Si Dul ambagi ilmu.

"Cara mboku kona adok sai ditambah... kudongi cak tian makai cuko para, api yona gohgoh mak rik cuko balando ?!" butanya Akas Usin mae pandai munih ilmu sai uwat di sanak IPA SMA.

"Supoja kas : ... mon cuko balando tolahna asam asetat, rumus kimia-na... CH3COOH, loyon guwai mbokuqo gitoh... mon guwai pamoros holau.

Gitoh pandai mboku mon makai cuko para sebagai koagulant sai tolahna asam semut atau asam formiat, rumus kimia-na... HCOOH. Gunako konsentrasi minimal 25%, anying mon ga hasilna boku padok, pakai juga konsentrasi 75%. Basa sikor ngulik-ulik bahan kimia sina ya mak lupa di pelajaran Dul Gitoh.

Ompai losai ngunjal gitoh guk tongah kobun karit, Akas Usin ngatot jerigen cuko para, diboruh kona lom gudu plastik maksudna haga mbokuqo lima imbir gitoh... pandai-pandai :

"Kroossaakk..... ghhrrr haauuuummm !!!" sanga bungkal halimawong balaq njuk sapi kok ticok-cok togak kukut rua di handopan Akas Usin.

Akas Usin gumaigai, haga lijung mak pandai... tumpak kukutna rasa ngor-ngor mak inggokna tilapahko, ya ticangus dalih punguna ngotong gudu cuko para.

Dalih cakna : "husyy... husyy !!", ambuyu halimawong sina... akas nyintakqo candung.... "husssy... husyy !". Halimawong ho malah sara modok.

Akas mula-i sadar lom bahaya, ya masang kudo-kudo mincak. Anying makda tisangko bokahna uwat sanga bungkal lagi halimawong tumpak norpau jak buri.

Akas tilokap, gudu isi cuko para tipotak guk unggak halokno laju nyimbuy badan halimawong sina.

"Grhhh... hauum !"... akas ditonyakqona dalih ngorau karuyung. Banguk halimawong sina kok kari-kari mbawoh galah. Umbauna busuk nihan njuk bangkai kucing tiguwai sam-sam.

"Nyak mak ga mati bak halimawong... Tuhanku tulung pay !". Akas Usin refleks budu'o dalihna nangkayung.

Antah sunipa, pandai-pandai terjadi suatu keajaiban. Halimawong rua sina tumpak lijung cangkolang kuruk rimba.

Akas Usin selamat, anying mengalami shock hebat, kalosuan munih bakdu karuyungna katan ka korau.... ya tigulik ditongah kobun karit.

Waktu sina Si Mat sikor singgah di sapu Dul Gitoh, ya ngaruhanqo kambing jolma dunggak talang sai dibangbangqo halimawong.

"Kambing duman jolma ho pagi-pagi ompai nganik jukuk di buri lambahan,... basa dibi kok lamput" cak Dul Gitoh ngonjuk pandai.

Si Mat mula-i ngorop-ngitop iponna andongi uwat halimawong jalang angganggu jolma tiyuh. Ya kilu di Dul Gitoh ngariki-i nyungsung Akas Usin.
"Payu Dul, riki-i nyak guk talang anjonguk Akas Usin !".

Tan rua laju kuruk kobun karit, … puas sopok gukja-guk udo akhirna Akas Usin dihalu tian sikor mojong.

"Payu kas... kubabay mulang !" cak Si Mat dalih ngangkat badan akas dicakakqona dunggak pingping.

Si Dul ngahotosi abah-abah paranti nampas laju ngiring diburi Si Mat.

"Nyakna mak api-api kiya Mat, mih katan cutik makinda babay nyak lokok kawawa lapah" cak Akas Usin dalihna rogoh jak pingping Si Mat.

Si Mat rik Si Dul lapah dalih ngarandan Akas Usin.
Ompay puluh monit lapah, kadongian suara : "hauuum ...", halimawong jona sanga bungkal ngahalau luwot jak buri.

"Dul !... kawal pai Akas Usin, ontini nyak mbancah halimawong sija !" cak Si Mat ngayon tan rua anjawoh mona.

Si Mat kok siap masang kudo-kudo dalih ngotong "lading cap gorpu". Sikor halimawong ho lumpak ga norpaw, Si Mat bukilas nyuksuk guk bah dalih nyucukqo lading ditanihi... halimawong ho laju katan.

Ya sara ngamuk, nyamborqo kukuna didada Si Mat, kawai-na tikahik dikuku halimawong ho. Sikorna ngahumpas, Si Mat salto guk unggak.

Galah halimawong sina dikarokkok-na radu, dalihna ngarajuk-rajuk dada halimawong rik lading. Bakdu kasakitan, halimawong ho laju buguling-guling rik Si Mat. Kadang Si Mat dunggak, kadang ya dibah. Halimawong sina laju mati, badan si Mat bola katan.