KAMINCAK PORAK

Kamincak.... binatang ronik sei hurikna diway dan pandai munih hurik didarak. Mon ya lapah carana lumpak... hap... hap...hap !!. Mon sikor tian ngumpul alang rami suarana mih ginca : “…. kraaaakk… kroookk… kuuung !” Sina sai cak ombay …. jajulukna kamincak porak.

Paija wat curita kamincak kabangitan ngalumpak-lumpak bakahna … “puuung !”, ya tikuruk lom panci sei wat way ompai titingkik dunggak kompor. Cawana lom hati : "Hufh... ndok bangikna ja kok uni mak bulangoi !".

Bakdu uni mak mandi, mula kamincak bulangoi diway sina sahaga-haga. Radu bulangoi ya kalosuan, lajuda ngagud-agud tikadugok dilom panci sina. Api pocak mon tikaturui dilom way handop ?. Kamincak sina sar landok turuy. Sikorna tisilop, way sar handop… handop… panas.

Badan kamincak sina kaku, mak lagi bugorak. Ya nginongan waktu way sina runggak, way panas kok ngemutungko bawakna. Mak lagi pandai lumpak, yak kok kaku nihan dan mak pandai lagi minjak luah jak lom panci. Kamincak sina akhirna mati gonggong…. mati sikorna turuy.

Basa tiangunko hurik manusa wat sei gohgoh rik fenomena kamincak tikulub sina. Hurik buruladas busuka-suka, kadang anjadiko jolma lupa dikesempatan ponting lom hurikna. Risok kesempatan holau mih tiliyu bgawoh bak ngutamako buruladas haga-hagana gukja guk-udo saduray-duray, ponan wat, dalih mabola waktu busantai.

Ya lino, tikalidau, mak miyot gawi jolma-jolma pintor angguwai prestasi, busaing dilaku-gorok “kecakapan hidup” cara jolma bahari. Sei tikarabay onti, kintu sikorna harus tampil, ya mak mampu ngiringi kemajuan jaman. Padahal jak jawoh hari sebonorna uwat kesempatan bulajar, ngasah diri jadi jolma holau sai kuat butodos untuk jomoh jadi bangik.

Alang tumadon waktuna mon hurik mih asa-asa'an buladas miyot mihani, numpang bubangik ditan kyai, ngandalko dekengan tan mama dsb.

Mak dapok lupa dilohot tan ombay…. :
Bubiduk diway doros
Timba bawak kamiling
Saro-saro titodos
Asak jomohna honing