DISOBU ANGIN SEPOI-SEPOI

Sambil nunggu boduk magorib bubunyi tando buka puasa, sikam sang lombahan kok ngumpul mojong digarang. “Luahko pai curito ho mbay !” cak ompuna sai bungsu sambil kakumpik dipok ombay mojong. Ompu mouli sai taman kanak-kanak sina laju dicium ombay dalih cakna : “Payu yo,  ombay ga bucurita sampai boduk magorib bunyi !”

 

Alkisah…. sang bungkal  Lambas sikor ningkik dunggak batang nyiwi. Ya mak sadar bakah kok diintikqo angin, angin Puting Beliung, rik angin Topan. Uwat rua angin haga butanding sapa sai paling gancang nyobu Lambas sina mae ya titiak jak batang nyiwi.

Cawa angin Topan, Lambas sina pacak kutiakqo  pangaji  tolu monit.  Angin Puting Beliung mak haga kalah, nyak mih  rua monit bugawoh, cakna sambil maha.

Mula-ida tan rua pusimbang nyobu Lambas ho.  Angin Topan kok nyobu mona, “huuuufhh…!”, disobuna kuat-kuat. Karasaian ratong angin kuat, Lambas sina tumpak bukarokkok dipangpang nyiwi.  Radu losai angin Topan tiliyu, bakahna Lambas mak titiak.

“Neee … niku !” cak Puting Beliung, angin Topan  laju nyorah sambil kapaliyom-liyoman di Puting Beliung. “Cuba pai giliran niku nyobu !”, cakna nyimbat Puting Beliung.

“Peh !... liakda yo !”, cak Puting Beliung di angin Topan. “Satu, … dua, … tiga : wuuusss…  wuuusss… !”, dihojina radu sampai tikahiyok.

“Wakakaka…. Wakakaka !”. Sikam tumpak tikahaha kaunyin sai cak ombay angin Puting Beliung sampai tikahiyok ho. “Lanjut mbay !” cak ompuna sambil nopuk paha ombay.

Ombay norusko curita : …

Anying Lambas ho matuh lokok nyargikgik dunggak nyiwi. Mak inggokna titiak. Angin Puting Beliung nyorah munih sambilna ngallap hiting. “Aeh gohgoh kitana !” cak Topan di Puting Beliung ambalos umungan kancana.

Rua angin kuat sina akhirna ngakui, Lambas sangun hibad, kuat, dan tahan guncang.

Mak uni jaksan, ratong Angin Sepoi-Sepoi modok di-tan rua.  Ya haga miyot munih butanding niakqo Lambas jak batang nyiwi. “Pahagamu lajuda mon haga turuk ngabai-abai  Lambas sina !” cak Puting Beliung sambil maha. “Taka sikam sai hongas kuat gagal apilagi niku sai hongas ronik !” cak Topan sambil ngarilong di Angin Sepoi-sepoi.

Angin Sepoi-sepoi mak nyimbat hamak. Ya langsung nahan hongas sangrobok, jaksan  hulu laju karuyung Lambas sina disobuna lambat-lambat bu-ulang kali. Cusssss…  cusss, ngison bangik nihan, sambil Lambas ho anjuk lom ayunan.… honing, sampai akhirna ya tikadugok. Anak mata Lambas kok mula-i tipodik, ya laju tikaturuy dan ngalopas kotongan. Ompai Angin Sepoi-sepoi nyobuna kimbang kuat cutik, mak uni jaksan pandai-pandai : “Karuntuuumb… !”,  Lambas sina laju titiak jak nyiwi. Angin Sepoi-sepoi monang, kancana : si Topan rik si Puting Beliung mih tisanggigi.

Jadi basa tiangunko, suponada hurik di dunia sa, takala kona ujian mak bangik bakna pacak butodos. Anying basa kona ujian bangik malah jadi lupa. Sikor lupa sinada kemungkinan waktuna titiak. Mula cak ombay : “kuti dang asa yo !”.

Ombay losai bucurita, pas munih boduk masigit bubunyi lah dibagol tian : “duugg,…. dududuuuug… dug.. dug… dug, …. tak … tatataaak… taaak… taaak; …. duuug… dug… dug !”. Kok kadongian suara adzan, sikam laju sumapu nyintakqo kanian.

Peh … selamat berbuka puasa di sepuluh hari terakhir, semoga ibadah puasa kita mendapatkan berkah dari Allah Subhanahu wata’ala, … amien.