Punti Mutung Ngun Mat Kutil

Lingkungan tiuh mudah nihan ngonjuk jajuluk sai biasona ngalokok dibadan laju tuha. Mat Kutil... jajuluk jak kanca-kancana paija bakna badan ho ronik ngitik-kitik anying ya pintor, bijak, calaq munih. Siasatna sai jitu sudo galak mak katoduhan lah jolma lamon.

Mat Kutil kagaduh anggoman balaq langgar, gomuk, ngadibag-kadibag, pubutong, cutik-cutik ngahojak. Untung cintona di anggoman, Mat Kutil totop busabar.

Kala sina Mat Kutil statusna sebagai kayon-kayonan Pasirah urusan lebak-lebung. Walau gaji ho ronik mak halok anying bakdu sambilna ngahuma rik bukobun punti munih, jadi gonok hodda untuk tian rua mihngot hurik pangaji sabulan.

Di harani sonin sina Mat Kutil kok minjak subuh, mulang jak pangkalan, radu mohpoh talosan ya bukawai… ya makai seragam ambtenaar lengkap tudung kapik-kapik, inggona nyotil-radu.

“Haga upacara nikuna qyai ?” ditanya anggoman-na dalih mocat tali kalambu.

“Iyu dik, biaso idang sonin sikam upacara dimukak sosat” cak Mat Kutil dalihna ngonaqo sapatu bud halom.

“Adoyyo dipawon uwat punti timulpul kanarian, … kanikda pai !” cak anggomanna luwot dalih ya ngalopih kalambu burak sina.

Mat Kutil laju kuruk pawon haga ngakuq punti timulpul. Basa kok dihaluna, ya tihuang ngaliak punti ho pocak halom mutung, halokna lupa dihatiqo anggoman dibingi sina ya tikaturuy kalosuan.

“Aee dik, ija punti api tahik kucing, mih ngahalom radu. Cubada nasak kotan, apiya angguwai kopi !” cak Mat Kutil bukomentar mak puas.

“Dang da lamon rasan qyai !, mon nikuna mirotok haga mongan bangik bakna kok saminggu sija mak ngonjuk tali balanja, jakpa gila kotan taka bias lagi mih tinggal sang canting. Mon mak haga nganik punti ho, umban-qo juga !” anggoman Mat Kutil ambalos dalihna ngutngut-ngutngut.

Mimang kok pandok tolu bulan sija, duit isentif  mak dijuki Pasirah tapak jaman karismon (karisis nomon), isentif kadang mongsa kadang ma-ongka. Anying diakhir tahun sina uwat isu-isu bahasa Pasirah ga ambagi-bagiqo ampolup, mula Mat Kutil rik kanca-kancana bukojut ratong jak pagi.

Mat Kutil mih ngarokop, mak lagi nyimbat umungan anggomanna, diusungna sanga bungkal toda punti mutung sina dikuruk qona lom kucigan calana. Ya laju nuju sosat. Dilapangan upacara kanca-kanca kaunyin kok kuruk lom barisan. Mat Kutil nambis tillat, ya halau-halau nyuksuk diburi barisan.
Mak uni jaksan, Pasirah ratong, … protokol upacara ngumung sapoja : “Amanat Inspektur Upacara…. Barisan diistirahatkan !”
Mula-i da ina Pasirah ho ngucah-kucah pidato : “…. hanu, … hanu, … hanu !”

Sikorna Pasirah ngonjuk amanat, salibukna munih Mat Kutil nyadak-sadak kucigan. “Tiak dipa puntikuna jona”, cawana lom hati.

Punti ho lobon bakdu kucigan calana tobuk. Mata Mat Kutil nyalang-calang ngaliak gukja-guk udo. Bokahna punti sina uwat dihandopan kancana, kari-kari dipailikna munih.

“Parmisi !”… cawana dikanca dalih ya andokdok punti halom sina.

“Adok sai diakuq ho Mat !”

“Tahik kucing pun ! ”

“Alang macom-macom nikuna, ... kok mula-i luwangan pocakna yo ?! ”

Dalihna ngarilong Pasirah sai lokok pidato, Mat Kutil nyimbat kancana luwot : ...
“Pun, kita butaruh haga ?, … nganik tahik kucing sija, mon niku sanggup onti kujuki hadiah !”

“Nggok-u, kanikda lahmu !” … cak kancana dalih galigian haga tika-utah.

Obrolan tian rua sina bokah dihatiqo Pasirah, ya tisinggung nihan ngaliak anak buah pocak mak saduli di pidatona. Mula Pasirah ngayon Kamra … mae Mat Kutil rik kancana ngobrol diusung guk mukak.

Jolma sanga lapangan upacara ngarokop kaunyin bakdu ngaliak Pasirah pocak haga butong ditan rua. Butanya Pasirah :
“Adok sai jadi obrolan kuti rua diburi barisan ho ?!”

“Mat Kutil … ngajak nyak butaruh nganik tahik kucing pun, anying nyak mak haga !”.

“Dipa tahik kucing sina, jajak kopai dinyak !” cak Pasirah di tan rua dalih matana tijolit siau.

Mat Kutil ngaluahqo punti mutung sina jak lom kucigan calana dalih anjawab : …
“ajayya pun tahik kucing-na, … nyakja sikor buntu mula ngajak yoja butaruh !”

“Hmmm… bokahna yo !, Mat … mon niku juga sai nganik tahik kucing sija ontini kujuki hadiah duit saratus ribu, kira-kira sanggup mak niku ?!” cak Pasirah di Mat Kutil.

“Sanggup pun … nyak sanggup nganikna !” Mat Kutil anjawab dalihna icak-icak karabaian di Pasirah. Barisan upacara laju bubar posai-posai…. tian kok ngalih pok dimukak haga ngaliak prosesi Mat Kutil nganik tahik kucing.

“Silahkan Mat… laju kanikda !” cak Pasirah kok mak sabar haga ngaliak bukti.

Disobu-sobuna pai punti mutung sai pangrasa tian tahik kucing ho, ngumbanko honi sai ngalokok … Mat Kutil icak-icak tikapodom galigian, radu sina ompai … luuppp kuruk banguk dingal-ngalna pin dua laju lapp ditolon-na.
“Hmmm …. pahik-pahik bangiiik pun !! ” cakna di Pasirah
“ Hibad… nikuja hibad nihan Mat “ cak Pasirah dalih salaman rik Mat Kutil

“Horeee… hidup Mat Kutil !! ” jolma sanga sosat butopuk salut nyaksiqo pertunjukan Mat Kutil nganik tahik kucing.

Losai upacara sina, walhasil, Mat Kutil mulang ngusung hadiah duit saratus ribu. Basa ompai tungguk dilambahan Mat Kutil ngonjukqo duit sina di anggoman dalih cakna : “… Sijada panggonti punti mutungmuna jona pagi … dik !, kita mongsa borkahna, punti mutung sina laku kujualko di Pasirah, dibayarna pangaji saratus ribu, jadida !”.

Anggomanna mih tisongil…. “Alang pandaimu nyopok rajoki qyai !”, cakna dalih ambabai Mat Kutil. Agoooyy.....