MINJA HALIMAWONG

Saminggu jak peristiwa gangguan halimawong jalang sina, Dul Gitoh nyinggahi Akas Aji sai ngaman rik tan ombai nunggui kobun limauna. Si Dul maklum bahasa Akas Aji sudo joma bijak sai mak lamon cawa.

Mula pagi sina, secara sangajo Si Dul butamu di Akas Aji dalihna ngusung tambaku Ranau, gula Cintamanis rik kopi Tanjung Lubuk.

"Assalamu'alaikum .. kas !" cak Si Dul ngonjuk salam hormat.
"Wa'alaikum salam... ompuku !, uni niku mak anjonguk ombaimu.

"Naa.. Si Dul bokahna, lajuda cakaq... api kabar tan umakmu ?!" cak ombai Aji munih nyimbat jak jandila.

"Alhamdulillah mbay, sikandua rik tan umak sihat kaunyin mak bada-bada" cak Si Dul dalih cakaq ijan laju ngonjukqo usungan.

"eeey... tambaku sija kagoringan Akasmu" cak ombay bolay suka hati mangsa oleh-oleh jak ompu.

Si Dul tisongil, ya bungga hati ngaliak Ombay rik Akasna lokok sihat, walaupun umur tian kok sekitar kepala pitu.

Tan Akasna ompai setahunsa cakaq haji, bakdu panen limauna sukses. Mon jaman paija berangkat haji cakaq kapal lawok. Ngaluhun kona mudah, uwat ongkos laju pesan tiket... langsung berangkat.

Sumang rik ganta, mon andaftar haji kabiansa... rua tahun lagi ompay berangkat, kuruk daftar tunggu pai.

Sapu-sapu tan Akas titogak ditongah kobun limau sai sikor bubuah robu... hingan bangik hati ngaliakna.

Sanga bakul limau dibatokqo tan Akas dunggak mija, cakna di Si Dul : "ajayya kanikda, ... mon cak joma pulimbang tolahna jeruk kuwek !"

Si Dul ngakuk limau sanga bungkal, bawak limau sina mudah ambukakna. Basa tiak jak batang bawakna galak suhak, mula ga tiputil nyanga sanga bungkal.

"Aeh kas... mamis nihan limau sija !" cak Si Dul dalih bangukna ngocap-kocap nganik limau.

"Di tiuh uwat kabar api dul ?", butanya Akas Aji bakdu kok sai bulan mak mulang.

Si Dul laju nyuritaqo masalah halimawong sai konjak ngorau Akas Usin rik Si Mat.
"Jadi halimawong ho lokok sanga bungkal lagi kas sai anjalang !" cakna di Akas Aji.

"Aeh halimawong kinda tibalahi Dul !, onti kita pinja juga … haga ?!." cak Akas Aji dalih ngaluahko karotas rik matolud.

Akas Aji laju anggambar disain perangkap halimawong dikarotas sina. Si Dul salut nihan di Akas Aji hadot beliau sudo selain ngobun limau, sabonorna ditiuh munih berprofesi sebagai "arsitek".

Kok lamon lombahan kolpah piwari sai dibangun tan Akas, jadi mon perkara anggambar perangkap halimawong... ina bagi Akas Aji mih persoalan sepele bgawoh.
Mak uni jaksan ombay kok ngaluahko munih kopi rik hubi tingguring, ... obrolan Si Dul rik Akas Aji sara tojang.

"Bakna mak makai krangkeng jak besi behel 14 juga kas ?" butanya Si Dul hal pinja sina.

"Haeh nikuja... ina balakga dibiaya dipa harus ngelasna munih... libukga, cukup makai 3 batang tabosu rik kayu-kayu gelam juga, ... tinggal nuar jak talang.

Mon halimawong ho kok kapinja, kayu-kayu sina pacak tipakai angguwai sapu-sapu." cak Akas Aji dalihna ngalopusko hasok rukuk "tingwik" (ngalinting diwik).

"Makai umpan kambing api kas ?" tanya Si Dul luot

"Si Bleki sudo onti tijadiko pionir, kecuali niku wat kambing guwai umpan... hehehe !" cak Akas Aji tikahaha dalih culukna ngarah di asu halom sai moguk dibah batang limau.

Tan rua mula'i ngatur strategi, Akas Aji sebagai ketua tim, Dul Gitoh jadi wakilna sai betugas ngumpulko jolma rik nuar batang kayu gelam rik tambosu.

Kopi bola, hubi tingguring hinik. Si Dul laju amit di Ombay-Akasna.

"Joh pagi kira-kira jam pitu nyak rik kanca-kanca kok tungguk dija" cak Si Dul dalih togak amit mulang.

"Payu dul... salam di tan umakmu" cak ombayna.
Jomoh pagi na wat selusin jolma tiuh ngiringko akas Aji kuruk talang. Tian bu usungan biak. Ngatot tambosu rik gelam, uwat sai tukang usung pakakas, uwat munih sai tukang usung kan rik gulai. Tian kaunyin siap anggawiko pinja halimawong.

Jadi sesuai gambar disain, pinja sina tiguwai bucu pak. Sai-saina jak kayu gelam ti cucukqo ditanoh nguliling. Tijuki rawang ronik. Pinja sina mirip kandang tapi sosok. Langgarna mih samitir.

Bagian dunggak tipasangko 3 tambosu balag sebagai pambiak, uncuk tambosu sina dipapah rawang. Jadi menurut skenario, si Bleki tikarukko ditiang penyanggah. Basa halimawong kuruk... asu pasti lijung nyuksuk dibah kutak pelindung. Halimawong pasti ngurukqo badan sara roklom. Basa kaso rawang kacai... tambosu dunggak ho tiak guk bah. Halimawong titonyak mak pandai begorak katimpa batang tambosu.

Dipasang munih buluh tojang guwai "umbul-umbul"... mae pinja pandai dikontrol jak jawoh. Basa umbul-umbul sina rubuh berarti ekskusi ompai terjadi.

Radu ambangun pinja, losai mongan-nginum, radu ngarukko si Bleki dilom pinja... rombongan laju mulang.

Akas Aji anguwai jadwal tugas kontrol... satu shif jolma tolu sai betugas. Sanga bungkal sinapang kecepek dikotong ketua regu shif, sewaktu-waktu tipakai nimbak mon halimawong sina pas kepergok.
Tapak pinja sina losai tiguwai.... dihari ketigo ompai uwat barita.
Waktu sina subuh... Akas Aji rogoh jak ijan haga ambukak kandang itik. Pandai-pandai Si Bleki ambosok jak buri dalih halau-halau modoki tan Akas.

Kukut kabolah buri kaluk, cupingna munih suhak cutik... pocak kabotohan. Tan Akas cakak muloh guk garang ngakuk toda kan rik balur kanarian. Dijuk kona di Bleki sangan pinggan. Sikor asu halom sina ladas mongan... Akas laju ti pangkalan ngakuk binyulu.

Radu sumbahyang subuh rik tan ombay... akas laju ngonjuk pandai bahasa si Bleki ganta kok uwat dibah lambahan.

"Naahh... bokahna mak bada-bada kiya ?" butanya ombay dalih ngantakko kopi panas rik kotan huban.

"Mak api-api, mih katan cutik !", cak akas dalih kilu pakubugan. "Kita ponah juga tian, sang robok lagi kanca-kanca Si Dul singgah dija !"

Losai sarapan pagi akas ngundahko sinapang kecepek. Di mukak lambahan, ya ngalopas timbakan guk unggak .... "tuuummb !!!". Maksudna ngonjuk kode mae tetangga kiri-kanan bola ratong. Anying bakdu suara timbakan sina .... sisu-sisu rik itik laju tikanjot....mih ginca " kueweekkk.. weeekk ... kueweek !!..... kok kok ptok .... kok kok ptoookk !!".
Jaman paija makkung ongka hape. Si Dul andongi suara sinapang jak arah liba, congki ina tan akas ngonjuk kode andudu "tim paninjuk halimawong" cakna lom hati.
Mula ya bugancang anjonguk kanca kaunyin. Basa selusin jolma kok bukumpul, tian laju berangkat nuju kobun limau akas Aji.

Dikobun limauna... akas Aji ngonjuk briefing sangrobok. Ngatur strategi sunipa cara tim modogi pinja halimawong sina. Mengantisipasi kemungkinan sai bakal terjadi. Radu sina ompai tian cakak talang.

Wat rasa harap-harap cemas dihati tian. Sonang amon halimawong ho kok kuruk lom pinja, ... anying munih kuatir kontu marik halimawong jalang sina pandai-pandai tilopas ... laju ngamuk ditian.

Sanak-sanak maranai haga mundur jak barisan liyom ditan akas... jolma kok tuha ngungkuk-ungkuk lagi berani dihalimawong. Jadi modalna mih nekad bgawoh. Bosi, candung, surampang... kok tisiap dipungu masing-masing.

Setengah jam lapah, tian ompai tungguk dilokasi. Pinja kok rubuh... halimawong kanahan tongahna tisopik batang tambosu. Gundangna ngulai-kulai... lokok pocak gogah.

Si Dul dikayon tan akas nimbak. Sai barih dikayon busiap pakakas, kontu marik halimawong ho lumpak.

Sinapang kok diarahko Si Dul di hulu halimawonng... jarak tembak kira-kira nom mitir. "Satuuu... duaa.... tiga... !" tan akas ngonjuk komando.

"Calotuuuuummb !!".... si Dul ngalopas pilur sinapang, anying pas titiba dikotuk halimawong sina, ya nangkayung radu.... "haauuuuuummm !!". Kukutna ngojang-kojang sangrobok, jaksan ya tikulai mak bugorak lagi.

"Horreeee.... !!" sanak-sanak maranai butopuk dalih joget-joget sonang hati.

Tan akas ngayon salah satu diantara sanak maranai sina modogi halimawong untuk ngamastiko keadaan halimawong sai ompai katimbak. Bokahna ya karabaian...
"Dang nyak kas,... kontu halimawong ho lokok hurik nyak mak barani... jadi yaja juga !" cak sanak ho dalih punguna nopuk sanak barih sai dikabolahna.
Atas saran tan Akas akhirna halimawong sina di cuwil-cuwil ko sanak maranai rami-rami makai galah tojang. Mak ongka lagi reaksina... jd kesimpulan-na halimawong ho mimang kok tumpos nihan.

Batang tambosu sai nimpa karuyung halimawong, radu disingkirko. Kukut rik galahna tikaruk rik tali. Ompai di andun-andun tian, diusung tian mulang guk kobun limau tan Akas.

Sambil lapah bubaris diburi Akas Aji... tim peninjuk halimawong sina bu nyanyi suka-suka. Tian nga nyanyiko lagu "ombay-akas".

Sebagai rasa turut bergembira... bapak Kaeria jomoh pagina ngantakko kambing sanga bungkal parantii tisambolih.

Tim peninjuk halimawong laju bu pista kambing guling untuk merayakan kemenangan ... Alang ladas tian.

Keterangan
Pinja = perangkap;
Minja = upaya penangkapan dengan menggunakan perangkap (jebakan).