PADUKA LAMBAS

Adil mon lom urusan cara hurik manusia hortina "sesuai porsinya". Joma sai dipercaya mengadili congki yona bijak. Anying risok joma bijak-sana makkung karuhan pacak bijak-sini. Mula joma bijak sudo porlu huluna ngison mak boku, pemikiranna matang mak mutung. Bersandar pada Ilahi robbi pemilik kaunyin hak keadilan, bukotong diaturan hukum munih andongi api cawa hati nurani.

Lawan du adil yona dzolim, hortina mak sesuai porsina. Ngajak mongan bangik anying mak nyadioko wai nginum... ina tikuruk dzolim, kecuali lupa mak tipadongot. Jolma sai tikona kadzoliman mak dapok ngarokop, ya porlu angkat bicara mae mak tikuruk katagori menyetujui laku dzolim sina.

Lom urusan pengadilan manusia lamon unsur sai porlu uwat, anjuk misalna uwat sai jadi hakim (pemutus perkara), uwat sai jadi jaksa (tukang nuntut), uwat sai jadi pengacara (tukang bila), uwat saksi, uwat barang bukti, uwat panitera (tukang catat), uwat palisi (tukang tinjuk), uwat sipir penjara (tukang kurung).

Sai mak porlu uwat yona, calo perkara (sales perkara). Mon uwat sanga bungkal sija, perkara losai maongka haguk. Salah pacak jadi bonor, bonor pacak tidodor. Sai kuat duit pacak monang, ngalahko kebenaran. Pemangku amanat mon ya lemah iman, mudah tigurauqo makai duit. Aturan hukum pengadilan sapoja gohgohda rik aturan hukum rimba. Mon dilom pulan kok jelas sapa kuat ya monang, sapa lemah ya alah. Halimawong ngalahko Manjangan, Ulay luhuk ngalahko Tikus, Lambas (Boruk) ngalahko Kucing rik Asu.

Alkisah uwat curita pengadilan lom pulan. Lambas jadi hakim, ngadili Kucing rik Asu sai bucokah soal roti sang bungkal. Waktu sina Kucing rik Asu sikor midang-midang di kalangan, bakah mangsa roti tikurilah di rangraya. Mae adil soal pembagianna, rotisina diusung tan rua haguk pulan ngahalui paduka Lambas.

Basa kok radu pokok-pangkal kasus roti sina tiluhunko, cawa Lambas di Asu rik Kucing, .... "roti sa kupolok tolu mae adil, sanga bagian duman Kucing, sanga bagian duman Asu, sisana dumanku, jadi kita kabagian kaunyin, oke ?!".

Walaupun sambil anak mata tijolit anying Kucing rik Asu setuju, ... mula'i da Lambas noktok roti sina jadi tolu. Lambas kok ngakuk bagian mona ompai ya ngonjuk masing-masing duman Kucing rik Asu. Radu sina Lambas cangkolang cakaq dunggak kayu.

Bakahna Kucing rik Asu siluhunan soal balag ronik jatah masing-masing, tian laju bucokah muloh. Cara Lambas ambolah roti balaqna sumang, roti sai diterima Kucing lebih borak jak duman Asu. Mula Asu protes... cakna di Kucing : "tukor juga, akukda sija, sai dipungumu sina untukku hadot tanihiku lobih balag jak tanihimu jadi mustina jatahkuna roti sai kimbang balag!"

"Mak wat ouu... !" simbat Kucing. Tan rua bucokah muloh sambil sicuil-cuilan.
Lambas ngingkik-ingkik dunggak kayu dalihna nganik roti mongsa "nuriang". Basa roti sai dikanikna kok bola, ompai ya rogoh muloh ngahalu'i Kucing rik Asu.

"Bakna kutina lokok bucokah yo ?, api kutina haga naik banding ?" tanya du Lambas dalih ngusap-usap jalak.
"Tuon,... nyak makkung puas dicara pembagianmu jona, hadot dumanku cutikga jak duman Kucing !", cak Asu sina dalih ipon-na ngorop-ngitop.

Kucing mih ngarokop, bakdu roti kapolok dumanna lobih balak jak duman Asu, jadi Kucing sabonorna dalam posisi digugat Asu. Ya mih tinganga takala roti sina diakuk Lambas muloh.

"Oke ... duman Kucing sija kutoktok lagi ! cak Lambas dalihna ngulohko roti sai radu disuhakna. Lambas cangkolang cakak dunggak kayu, ya mongsa tambahan roti lagi. Dalih nganik roti, Lambas ngarilong muloh guk bah, diliakna Kucing berubah posisi anggugat Asu, bakdu roti duman Kucing kalah balak jak duman Asu.

Asu kari-kari haga lijung ngusung rotina, anying mak kaudak bakdu gundangna dikotongi Kucing. Lambas tikasongil ngaliak tan rua riyok. Radu mabola roti kedua ya rogoh luot dalih butanya : "api lagi sai mak beres sa ?"
Cak Kucing : "toktok da lagi roti duman Asu hadot lokok balak jak dumanku !"

Sikor Lambas ngarobut roti duman Asu, ... kucing tumpak lijung mona ngusung roti dumanna sai tinggal cutik. Lom hati Kucing basa rotisa ditoktoki Lambas torus pacak bola laju mak kabuhian lagi.

Bakdu Kucing sa lijung, Asu cangkolang ngahalau. Ya lupa roti dumanna lokok uwat cutik dibanguk Lambas. Pocak mak kabonoran, laju Kucing ho lumpak dunggak kayu. Asu panas hati, haga butakat ya mak pandai... nomon Kucing ho dibosokna. Lambas sai kok mongsa luot roti ketigo, dibosokna munih.

Cugak nihan Asu di Kucing rik Lambas, mula tapak sina laju ganta Asu boji nihan di Kucing rik Lambas.

Jadi basa tihatiko, cara Lambas nogakko hukum rimba bakahna sambil ya ngakuk bagian munih. Idangna ngadili waktu sinada kasompatan bagina nambah bagian. Indok kulawi...!