Si Kodhi Bubiduk Diway Doros

Jaman paija uwat maranai tolahna Si Kodhi, gawina cak ibarat istilah anak gaul gantasa sebagai LLAJ alias Luntang Lantung Anak Jalanan, hurik mak halok. Jolma tuha maengka lagi kok mati, kolpah piwari ditiyuh lamon kiya tapi mak munih peduli dinasibna. Maengka sai ngajak bugawi dikobun langsak tian atawa ngajak ambacah atawa nampas…. maengka !. Kolpah piwarina kok sumapu dihitak kaunyin. Ga kilu gawian di Pambarop mak mungkin, hadot Pambarop kala sina ompai anggaduh anggoman anyar, jadi idang harani mih nganguk-anguk angoman begawoh.

Polik hatina mih nunggu lombahan burak, kobun maengka, dipa gawian sokot… mula suatu hari Si Kodhi butekad ninggalko tiyuh nuju ibu kota ngadu nasib kalau-kalau jomoh pacak jadi jolma kayo. Mon kok kayo ompai mulang lagi guk tiyuh bugabung di Partai jaksan nyalon jadi Bupati, supona kira-kira rongokna lom hati. Sebonorna Si Kodhi mak pintor ga munih, biaso begawoh anying kelurusan hatina dapok tiacungi jempol, ya sijujur-jujur maranai tiyuh. Hana-hana aqidah agama sai jadi modal hurikna.

Nah… payu, singkat curita Kodhi laju bugawi ngakuk upahan di kota. Bukuli bangunan laju, jadi tukang babay karuntung konjak hoda, inggona sagalo gawi halal kok dicubana. Anying penghasilan sebagai kuli kasar ho mak halokga, mih bola-bola untuk mongan bugawoh. Ya risok ngalih guk kota barih walau mih ngusung duit cutik hana-hana puluh ribu. Pas sikor duit santing ho mon karasaian botoh mih ditodosna. Mongan mih kadang-kadang kintu pas uwat jolma ngonjuk, mon maengka sai ngonjuk apa boleh buat. Bobot calana dikaruk kona koncong-koncong mae rasa botoh mak karasaian ga. Nasib si Kodhi anjuk hiring-hiring pantun kumoring :

Bubiduk diway doros

Timbana bawak joring

Saro-saro titodos

Kekalau mantuha goring

Bubiduk diway doros sudo makda bangik, biak, porlu tanaga kuat. Apalagi timbana mih bawak joring, hortina modal usaha mak sasuai rik situasi biak sina.

Lanjut curita, sikorna lapah kukut di suatu kota sai pendudukna lamon jolma gorut, Si Kodhi buhodak di taman pusat kota. Ya mojong sambil ngaluahko inuman jak lom tas. Uwai paranti nginumna tinggal sang golas… gok.gok.gok diinumna sampai hinik, tinggal lagi gudu bangkang sina ga diumban kona. Kodhi minjak sambil nuju pok tong sampah, ompai lima langkah kukutna tipailik dibungkusan warna hujau sai isina buntor-buntor anjuk ikar, bungkusan sina diakukna laju dikuruk kona lom kucigan.

Radu sina ya norusko lapahanan. Ompai tilikut sang robok bakah wat bakas tuha masat-pasati pudakna. Bakas ho tumpak andudu : “Oy nakan !, nyak ga butanya diniku, nyakja kalobonan barang, kintu niku ngaliak atawa ngahalui bungkusan sina ga kutobus juga, ajayya kusiapko duit sajuta !”

Si Kodhi kimbang tihuang, lom hatina bungkusan sa halokna duman bakas sija. Mae pasti dan yakin, si Kodhi butanya : “Apiya pocak bungkusan ho pak Ngah ?!” tanya si Kodhi.

“Bungkusan sina warna hujau, isina permata inton barlian rik kalung mas !” simbat bakas tuha sina.

Lom hati si Kodhi, “Tuhanku… nyakja sangun porlu duit, tanihi sa botoh. Nyak pacak ngakuk duit tobusan sina untuk sanguku dirantau jaksan bungkusan sija kujukko diya”. Anying hati nurani si Kodhi mak tega ngakuk duit jak bakas tuha sina.

Si Kodhi ngaluahko bungusan hujau jak lom kuciganna : “Halokna sija pak Ngah bungkusan dumanmu, jona kuhalu disan !” cakna sambil nunjuk rodik tong sampah sinangun dan nyorahko bungkusan.

“Tuon.. tuon sijada barang sai ku unut, nah... ajayya duit sajuta tobusanna, barang sa kuakuk yo !” cak bakas ho sambil narima bungkusan inton permata.

“Makwat, makinda pak Ngah, sikandua mak layak nerima duit makai cara anjuksa !”

“Nahh… akukda oy nakan-ku, mak api-api ina imbalan untukmu jadi akukda !” cak bakas ho maksa.

“Mak wat !, … mak wat !, terimakasih nyak mak haga pak Ngah !” simbat Si Kodhi sambil lapah anjawoh.

Bakas tuha sina tumpak nyusul sambil halau-halau : “Oy nakan ! … ponah pai ! … tahan pai !”. Pungu Si Kodhi laju dikotongina dalih cawana : “Nyak ga butanya lagi diniku, sebonorna lapahananmu ja ga hagukpa yo ?”

“Sikandua ngarantau ga nyopok gawian sai pacak hurik layak juga pak Ngah !” cak si Kodhi sambil  ngarilong.

Lom hati bakas tuha sina : “hmmm…. ajayya jolma sai jujur, pekerja keras untuk kuangkat jadi wakilku”. Bakas sina sebonorna juragan tambang permata, anying bakdu penampilan-na biaso begawoh jadi mak katahuman dihulun bahasa yana konglomerat.

“Mon niku mak haga diduit sa, sunipa mon niku bugawi juga disikam, niku ngaman rik sikam di pulau sebagai mandor atawa wakilku ?!”

Singkat curita, Si Kodhi setuju jadi mandor pertambangan duman pak tuha sina. Sar uni bugawi disan hubungan buruh-majikan sar holau. Si Kodhi bugawi jujur tanpa pamrih dan api sai digawikona memenuhi target. Sampai akhirna si Kodhi bugawi disan pangaji sai tahun ya laju diakuk bakas ho jadi mantu. Hadot pak tuha sina kok waktuna istirahat ngalopas urusan dunia dan munih anak moulina sang bungkal kacah tilisoh mirotok jadi kabayan.

"Ganta Kodhi hurikna kok bangik, mangsa anggoman cindo, mangsa munih horto warisan tambang permata jak mantuha", cak tombakas ngakhiri curita.

"Agoooi … alang honing hatimu Kodhi. Mon pandai bubuka sa niku dang mak mulang yo !, kolpah piwarimu ditiyuh tamtu kok nunggu, … tian tamtu miyot suka hati diniku.... agooooi !", bik Ocik nyimbat sambilna mindahko katupat dilom baskom.